ᐅᕙᓃᑦᑐᑎᑦ : ᐊᖏᕐᕋᖅ » ᐅᒪᓇᕐᔪᐊᖅ
ᐅᒪᓇᕐᔪᐊᖅ
ᖃᐅᔨᒪᔭᐅᖃᓯᐅᑎᒻᒥᔪᖅ ᖃᓪᓗᓈᓄᓐ Blacklead Island–ᒥᒃ.
140 Ko
ᐊᔪᕆᖅᓱᐃᔨᐅᑉ ᐃᓪᓗᖓ ᓯᒃᑳᑦᑎᒃᑯᓪᓗ ᐊᖅᕕᒐᓱᐊᖅᕕᖓ ᐆᒻᒪᓇᖅ
ᐅᒪᓇᕐᔪᐊᖅ ᐊᕐᕙᓂᐊᖅᑎᓄᑦ ᐃᓂᒋᔭᐅᖃᓯᐅᑎᓂᖅᐸᐅᕙᑦᑐᒥᓂᖅ ᐸᓐᓂᖅᑑᑉ ᑲᖏᖅᓱᐊᓗᐊᓂ. ᐊᑎᖓ ᑐᑭᓕᒃ "ᓲᕐᓗ ᐃᒪᖅᐱᒻᒥᐅᑕᐅᑦ ᐆᒻᒪᑎᖓ," ᕿᑭᖅᑕᐅᓂᖓᑕᓗ ᐋᖅᑭᑦᓯᒪᓂᖓᓄᑦ ᑕᑯᓗᒍ ᐅᖓᓯᑦᑐᒦᓪᓗᓂ ᑐᕌᖓᔪᖅ ᑕᐃᔭᐅᓂᖓ. ᐅᑮᕕᐅᕙᑦᑐᒥᓂᖅ ᐃᓚᖏᓐᓄᑦ ᐃᓄᐃᑦ ᐅᐊᖕᓇᖅᐸᓯᖓᓃᑦᑐᓄᑦ ᐸᓐᓂᖅᑑᑉ ᑲᖏᖅᓱᐊᓗᐊᑕ.
ᖃᓪᓗᓈᑦ ᖃᐅᔨᓇᓵᕐᓂᖏᑦᑐᑦ ᐅᒪᓇᕐᔪᐊᖅ ᐃᓂᑦᓴᑦᓯᐊᕙᐅᒋᐊᖓ ᐊᕐᕕᓕᕆᕕᒋᓗᒍ, ᐱᔾᔪᑎᒋᓪᓗᒍ ᖃᓂᓐᓂᖓᓄᑦ ᓯᓈᓄᑦ ᐅᐱᕐᖓᓵᒃᑯᑦ ᐊᕐᕙᓂᐊᕐᕕᒋᒋᐊᖓ. ᐋᒃᑑᕝᕙᒥ 1860–ᖑᑎᓪᓗᒍ, ᐊᕐᕙᓂᐊᖅᑏᑦ ᐅᒥᐊᓕᑦᑕᐃᑦ ᒥᐊᓕᒐᐃᑦ ᐅᒥᐊᕐᔪᐊᖓᓐᓂᒃ ᐊᑎᓕᒻᒥᒃ Black Eagle–ᒥᒃ ᐃᓪᓗᓕᐅᖅᑐᒥᓃᑦ ᑕᕝᕙᓂ ᕿᑭᖅᑕᒥ. ᐊᕐᕌᒍᑦᓴᐃᓐᓇᖓᓂ, ᓯᒃᑳᑦᓰᑦ ᐊᕐᕙᓂᐊᖅᑏᑦ ᓴᓇᓐᓂᕐᒥᔪᑦᑕᐅᖅ ᓇᒻᒥᓂᖅ ᐊᕐᕙᓕᕆᕕᒃᓴᒥᓐᓂᒃ. ᓯᕗᓪᓕᖅᐸᒥ, ᐊᕐᕙᓂᐊᖅᑎᓄᑦ ᐅᒥᐊᑦ ᖃᓪᓗᓈᓂᒃ ᐊᕐᕙᓂᐊᖅᑎᓂᒃ ᑎᑭᐅᔾᔨᔪᕕᓃᑦ, ᑭᓯᐊᓂ ᖃᐅᔨᓕᑕᐃᓐᓇᖅᑐᒥᓃᑦ ᐃᓄᓐᓂᒃ ᐃᖅᑲᓇᐃᔭᖅᑎᖁᑎᖃᖔᕈᓇᓂᕐᒥᓐᓂ. 1870 ᒥᑦᓯᑎᓐᓂ, ᐊᕐᕙᒐᓱᐊᖅᑏᑦ ᐃᓄᐃᓐᓇᐅᓂᖅᓴᒥᓃᑦ, ᐊᕐᕙᓂᐊᖅᑏᓪᓗ ᐅᒥᐊᖏᑦ ᐅᓯᓂᖅᓴᐅᑦᓱᑎᒃ ᑕᐅᖅᓰᒍᑎᒃᓴᓂᒃ. ᖃᓛᕐᓂᑯᒧᑦ ᐳᔫᖅᑐᖅ ᐅᒥᐊᖅ ᑎᑭᑉᐸᓪᓕᐊᓕᕋᐃᒻᒪᓐ, ᐃᓄᐃᑦ ᓂᒋᖅᐸᑎᓪᓗᒍ ᓇᐃᓇᓱᐊᖅᐸᑦᑐᒥᓃᑦ ᖃᓛᖅᑐᓱᓐᓂᒥᒃ ᐊᐅᓚᐅᑎᓱᓐᓂᒥᒃ. ᑕᑯᓚᐅᕋᑎᒃ ᐅᒥᐊᒥᒃ, ᐳᔪᕐᒥᒃ ᑕᑯᖅᑳᖅᐸᑦᑐᒥᓃᑦ ᐅᖓᓯᑦᑐᒥ.
74 Ko
ᐆᒻᒪᓇᖅᔪᐊᕐᒥ ᐊᖅᕕᒐᓱᐊᖅᕕᒃ, ᑎᓂᔾᔪᐊᖅᕕᒻᒥ, ᕿᑭᖅᑕᓗᒻᒥ
ᐸᓐᓂᖅᑑᑉ ᑲᖏᖅᓱᐊᓗᐊᓂ ᓯᕗᓪᓕᖅᐹᑦ ᐊᙱᓕᑲᒥᐅᑦ ᐊᔪᕿᖅᑐᐃᔨᖏᑦ, ᐃᓚᒋᔭᐅᓪᓗᓂ ᐅᖃᒻᒪᒃ (Edmund Peck), ᑎᑭᑦᑐᒥᓂᖅ ᐅᒪᓇᕐᔪᐊᒧᑦ 1894–ᖑᑎᓪᓗᒍ. ᑳᑦᑐᓄᑦ ᕿᒻᒥᓄᑦ ᓂᕆᔭᒥᓂᖅ ᑐᒃᓯᐊᕐᕕᓕᐊᕆᒋᐊᖓᖅᑕᒥᓂᖓᑦ, ᐃᓄᓐᓄᑦ ᐃᑦᑕᓕᐊᒥᓂᖅ. ᐱᐊᒃ ᐃᓕᓐᓂᐊᑎᑦᓯᖃᑦᑕᓕᖅᑐᒥᓂᖅ ᑎᑎᖅᑲᓂᒃ ᐃᓄᑦᑎᑑᖅᑐᓂᒃ ᑎᑭᓯᒪᖅᓴᑐᐃᓐᓇᓕᖅᓱᓂ ᐅᒪᓇᕐᔪᐊᒧᑦ. ᓯᕗᓪᓕᕐᒥ ᐊᕐᓇᐃᓐᓇᐅᓂᖅᓴᐃᑦ ᖃᐅᔨᒍᒪᓂᓕᒥᓃᑦ ᓄᑖᒥᒃ ᐅᒃᐱᓂᕐᒥᒃ. ᒥᒃᓯᑎᓐᓂ 1900–ᓚᐃᑦ, ᐊᒥᓱᑦ ᐅᖃᓕᒫᕈᓐᓇᓕᖅᑐᒥᓃᑦ ᒎᓯᐱᓕᓐᓂᒃ ᐸᐃᑉᐹᖁᑎᓂ.
ᓄᙳᖏᓐᓂ ᑕᒪᒃᓱᒪ ᐊᕐᕌᒎᑉ, ᑐᒃᓯᐊᕐᕕᒃ ᑲᑎᕝᕕᐅᕙᓕᕐᓂᕐᒥᔪᖅ. ᑐᒃᓯᐊᖅᐸᑦᓱᑎᒃ ᐊᑕᐅᓯᐊᕋᑎᒃ ᐱᓇᓱᐊᕈᓯᕐᒥ. ᓱᕈᓰᑦ ᐅᕕᒃᑲᐅᓂᖅᓴᐃᓪᓗ, ᐃᓚᒋᔭᐅᓪᓗᑎᒃ ᐱᐊᕋᓖᑦ ᐊᓈᓇᒋᔭᐅᔪᑦ, ᐸᐃᑉᐸᔾᔨᕆᕙᑦᑐᕕᓃᑦ ᐅᓪᓗᑐᖃᐅᓕᕋᐃᒻᒪᓐ. ᐊᖑᑎᖏᑦ ᐱᖓᑦᓯᐅᓕᕋᐃᒻᒪᓐ ᐅᓐᓄᒃᑯᑦ ᑐᒃᓯᐊᕕᒻᒦᓯᕙᒃᓱᑎᒃ, ᐱᙳᐊᖅᓱᑎᒃ, ᓱᐴᖅᑐᖅᓱᑎᒃ ᑐᐹᑭᒥᒃ, ᕿᒥᕐᕈᐊᖅᓱᑎᓪᓗ ᐊᔾᔨᙳᐊᓕᓐᓂᒃ ᐅᖃᓕᒫᒐᕐᓂᒃ.
188 Ko
ᐆᒻᒪᓇᖅᔪᐊᕐᒥᐅᑕᐃᑦ ᐃᓄᐃᑦ
ᓂᔾᔮᔫᓂᒃ ᓂᔾᔮᑎᑦᓯᖃᑦᑕᕐᓂᖅ ᐃᓚᒋᔭᐅᖃᓯᐅᑎᓯᒪᓪᓚᕆᑦᑐᒥᓂᖅ ᐃᓅᓯᕆᔭᐅᔪᒧᑦ ᐅᒪᓇᕐᔪᐊᒥ. ᓄᑕᕋᐅᓚᐅᖅᓯᒪᔪᖅ ᐃᖃᓗᒻᒥᐅᖅ ᐃᖅᑲᐅᒪᒋᔭᖃᖅᐸᑦᑐᒥᓂᖅ ᑖᓂᓯᖅᓱᓂ ᐃᙱᑎᑦᓯᔪᖃᖅᑎᓪᓗᒍ. ᑖᓂᓯᕇᕋᐃᒻᒪᓐ ᖃᓪᓗᓈᓄᑦ ᑳᐱᑕᐃᓄᑦ ᑐᓂᔭᐅᕙᒃᓱᓂ ᑕᒧᓗᒐᒃᓴᓂᒃ ᓲᕐᓗ ᓂᐊᖂᔭᓂᒃ ᐸᑕᓕᖅᓯᒪᔪᓂᒃ ᒪᓛᓯᒥᓪᓘᓐᓂᑦ. ᐊᑕᐅᓯᐅᒐᓗᖅ ᐃᓄᒃ ᐊᒋᐊᕋᖅᓱᓂ, ᐊᒥᓱᓪᓗ ᐃᓄᐃᑦ –ᐊᕐᓇᐃᓐᓇᐅᒐᔪᒃᓂᖅᓴᐅᑦᓱᑎᒃ– ᓱᐴᒐᖅᑎᓪᓗᒋᑦ. ᑐᒃᓯᐊᕐᕕᒃ ᐱᐊᓇᐅᔭᖅᑕᖃᖅᐸᓂᕐᒥᔪᖅ, ᒥᑭᔪᒥᒃ ᐱᐊᓇᐅᓪᓗᓂ. ᔫᒪᓂᒦᙶᖅᓯᒪᔪᖅ ᐊᑎᓕᒃ ᐴᓐᕼᐊᑦ ᕼᐊᓐᔅ (Bernhard Hantzsch) ᐃᓕᓐᓂᐊᑎᒃᓯᕙᒃᑐᒥᓂᖅ ᐊᕐᓇᓂᒃ ᐱᐊᓇᒥᒃ ᐅᒪᓇᕐᔪᐊᒦᓐᓂᕐᒥᓂ 1909–ᒥ 1910–ᒧᑦ.
ᕼᐊᓐᔅ ᑎᑎᕋᖃᑦᑕᓂᕐᒥᔪᖅᑕᐅᖅ ᐅᒪᓇᕐᔪᐊᖅ ᖃᓄᐃᑦᑑᓂᖓᓂᒃ ᑕᒫᓂᓐᓂᕐᒥᓂ. ᑖᑦᓱᒪ ᑲᓇᓐᓇᖅᐸᓯᖓᓂ ᕿᑭᖅᑕᐅᑉ ᖃᕐᒪᖅᑕᖃᐅᖅᑐᒥᓂᖅ ᐊᒥᓱᓂᒃ ᓯᒃᑳᓯᒃᑯᓪᓗ ᑕᐅᖅᓰᕕᖁᑎᖓᓐᓂᒃ, ᑐᒃᓯᐊᕕᓪᓗ, ᐊᔪᕿᖅᑐᐃᔨᐅᓪᓗ ᐃᓪᓗᖓ ᒥᑭᔫᓐᓂᒃ ᐃᓪᓗᕈᓯᓕᒃ ᑰᖃᕐᕕᖃᖅᓱᓂ. ᑕᒪᒃᑯᐊ ᐃᓪᓗᐃᑦ ᐅᖅᑯᐊᓃᑦᓱᑎᒃ ᖃᖅᑲᐅᑉ, ᖃᖔᓂ ᐊᒥᓱᓄᑦ ᐃᓄᓐᓄᑦ ᐃᓗᕕᖅᑕᖃᐅᖅᑐᒥ. 168 ᐃᓄᐃᑦ ᐅᒪᓇᕐᔪᐊᑉ ᐊᕙᑖᓂᒥᐅᑕᒥᓃ. ᖁᓕᓪᓗ ᖁᓕᐅᙱᒐᖅᑐᓪᓗ ᖃᓪᓗᓇᒥᒃ ᐊᑖᑕᖃᖅᓱᑎᒃ.
131 Ko
ᐆᒻᒪᓇᖅᔪᐊᕐᒥ ᐊᖅᕕᒐᓱᐊᖅᕕᒃ ᑎᓂᔾᔪᐊᖅᕕᒻᒥ, ᓄᓇᕗᑦ
ᐃᓄᐃᑦ ᖁᕕᐊᒋᔭᓕᒥᓃᑦ ᐅᒪᓇᕐᔪᐊᒥ, ᑭᓯᐊᓂᑦᑕᐅᖅ ᐊᒃᓱᕈᕐᓇᕐᔪᐊᓚᐅᖅᑐᒥᓂᖅ 1900 ᐊᕐᕌᒍᐃᑦ ᐊᑐᓕᕋᑖᖅᑎᓪᓗᒋᑦ. ᐊᒥᓱᓄᑦ ᐃᓐᓄᓄᑦ ᐊᔪᕐᓇᐸᓐᓂᕐᒪᓐ ᓂᕿᑦᓴᕐᓯᐅᕐᕕᒋᒋᐊᖓ ᐊᒥᒐᕐᓂᐊᖏᑦᑐᒥᒃ, ᐊᔪᖅᓴᓂᖅᓴᐃᑦ ᐃᓄᐃᑦ, ᕿᒻᒥᖃᙱᑦᑐᑦ ᕿᒧᒃᓯᕈᑎᒃᓴᓂᒃ ᖃᔭᕐᓂᓘᓐᓃᑦ, ᓇᑦᓯᖃᕐᓂᖅᓴᒨᕈᓐᓇᐸᓐᓂᖏᒻᒪᑕ, ᐅᑭᐊᒃᓵᒃᑯᓪᓗ ᐊᖑᓇᓱᐊᕆᐊᖃᖅᐸᓂᕐᒪᑕ ᐊᑦᑕᓇᖅᑐᒃᑯᑦ ᑐᕙᐃᓐᓇᖅᑎᒍᑦ ᓯᓈᓂ. ᐊᖑᓇᓱᐊᕈᑎᖃᑦᓯᐊᓂᖅᓴᐃᑦ ᐊᙳᑕᒥᓂᕐᒥᓐᓂᒃ ᐊᒥᖅᑲᐅᔾᔨᕙᒃᓱᑎᒃ, ᑭᓯᐊᓂ ᐃᓛᓐᓂᒃᑯᑦ ᐊᒥᒐᖅᓯᕙᓐᓂᕐᒪᑕ ᓂᕿᑖᖅᑐᐃᓐᓇᐅᖁᔨᒐᓗᐊᖅᓱᑎᒃ. 1905–ᖑᑎᓪᓗᒍ, ᐅᑭᐅᒃᑯᑦ ᐊᒃᓱᕈᕐᓇᕈᑖᓂ, ᐊᔪᕿᖅᑐᐃᔨ ᔫᓕᐊ ᐱᐅᓪᐱ (Julian Bilby) ᐅᖃᐱᓗᑦᑐᒥᓂᖅ ᐃᓄᓐᓄᑦ ᑕᐅᓯᐅᔾᔭᐅᓂᐊᖅᑐᕆᒋᐊᖓ ᐅᖅᓱᖓ ᕿᓯᖓᓗ ᓇᑦᓯᖅᐸᑦᑕᖏᑕ, ᐅᖅᓱᒃᓴᖃᕐᓂᐊᖏᒃᑲᓗᐊᕈᑎᒃ ᖁᓪᓕᒥᓐᓄᑦ. ᐊᒥᒐᖅᑐᓂᒃ ᓂᕆᔭᒃᓴᖅᑖᖅᑎᑕᐅᕙᓐᓂᕐᒪᑕ ᐊᕐᕙᓂᐊᖅᑎᓄᑦ, ᐊᒥᓱᓪᓗ ᐃᓄᐃᑦ ᖃᓂᒻᒪᖃᑦᑕᓂᖅᓱᑎᒃ.
ᓯᕗᓪᓕᖅᐹᒥ ᐅᓇᑕᕐᔪᐊᓂᖅᑕᖃᖅᑎᓪᓗᒍ, ᐅᒪᓇᕐᔪᐊᖅ ᖃᓪᓗᓈᖏᕈᑎᔪᒥᓂᖅ. ᒥᐊᓕᒐᒥᐅᑦ ᓂᐅᕕᐅᑎᖃᕇᕐᓂᕐᒪᑕ ᐊᕐᕕᓕᕆᕕᒻᒥᓐᓂ ᐊᔪᕿᖅᑐᐃᔩᑦ ᐊᐅᓪᓚᑐᐊᕐᒪᑕ, ᓯᒃᑳᑦᓯᒥᐅᖅ ᔭᐃᒥᓯ ᓛ (James Law) ᖃᓪᓗᓈᑐᐊᖑᓕᖅᑐᕕᓂᖅ ᕿᑭᖅᑕᒥ ᑕᒫᓂ. ᑕᐅᓯᖅᓯᐅᑎᑦᓴᐃᕈᑎᓐᓂᕋᒥ ᐆᒪᑎᑕᐅᓕᖅᑐᕕᓂᖅ ᐊᖑᓇᓱᐊᖅᑎᓄᑦ ᐸᔪᒃᑕᐅᕙᑦᓱᓂ ᓂᕆᔭᒃᓴᖏᓐᓂᒃ. ᑕᒫᓂᒐᓚᒃ, ᐃᓚᒌᑦ ᐃᓘᓐᓇᑎᒐᓚᒃ ᐊᓯᐊᓄᑦ ᐊᐅᓪᓛᖅᓯᒪᓕᖅᑎᓪᓗᒋᑦ. ᐊᒥᓱᑦ ᓯᐊᒻᒪᖅᑎᕆᕙᓪᓕᐊᔪᒥᓃᑦ ᐃᓄᒃᑎᑐᑦ ᑎᑎᕋᐅᓯᕐᒥᒃ ᑯᓚᐃᓯᑑᓯᒥᐅᑕᐅᓂᕐᒥᓪᓗ ᐃᓅᖃᑎᒥᓐᓄᑦ. ᑭᖑᓪᓕᖅᐹᒥ ᐊᕐᕙᑦᑐᖃᖅᑐᒥᓂᖅ ᐅᒪᓇᕐᔪᐊᒥ 1921–ᖑᑎᓪᓗᒍ.