ᐅᕙᓃᑦᑐᑎᑦ : ᐊᖏᕐᕋᖅ » ᐋᓐᑐᕉᔅ (Andrews)
ᐋᓐᑐᕉᔅ (Andrews)
ᐋᓐᑐᕉᔅ ᒥᐊᓕᒐᐃᑦ ᐅᒥᐊᖁᑎᒥᓂᖓ ᑎᖏᕐᕋᐅᑕᓕ ᐊᖑᐊᕐᓗᒍᓗ ᐊᖁᒋᐊᓕᒃ ᐱᖁᑎᒋᔭᒥᓂᐅᓪᓗᓂ ᐃᖏᕐᕋᓂᖃᑦᓯᐊᖅᑐᒧᑦ ᐊᒃᓱᐃᕐᒧᑦ ᐊᕐᕙᓂᐊᖅᑎᓄᑦ ᓂᐅ ᐱᐊᑦᕗᐊᑦᒥ, ᒫᓴᓲᓴᑦᓯᒥ (New Bedford, Massachusetts) ᐱᒐᓱᐊᖅᑎᖅᓱᓂ ᐅᑭᐅᖅᑕᖅᑐᓕᐊᖅᑐᒥᓂᖅ ᐊᕐᕙᓂᐊᖅᑎᓄᑦ ᐊᖁᑕᐅᓪᓗᓂ 1860–ᖏᓐᓂ. ᑭᖑᓪᓕᖅᐹᒥ ᐃᖏᕐᕋᒐᒥ 1867–ᖑᑎᓪᓗᒍ, ᓱᕋᑦᑐᒥᓂᖅ ᖁᐊᕐᓇᖅᓯᑎᓪᓗᒍ 1867–ᒥ, ᐸᓐᓂᖅᑑᑉ ᑲᖏᖅᓱᐊᓗᐊᓂ.
ᐅᒦᔭᕋᔪᑦᑐᖃᖅᐸᑦᑐᒥᓂᖅ ᐸᓐᓂᖅᑑᑉ ᑲᖏᖅᓱᐊᓗᐊᓂ, ᓯᑕᒪᐅᔪᖅᑐᓂᒃ ᐅᒦᔭᖅᑐᖃᖅᑐᒥᓂᖅ ᐊᕐᕌᒍᖏᓐᓂ 1859 -1870. ᐋᓐᑐᕉᔅ ᐅᒥᐊᕐᔪᐊᖅ ᐊᔾᔨᐅᙱᒍᑎᑐᐊᖓ ᑎᑎᕋᖅᑕᐅᓯᒪᔪᓂ ᖃᐅᑕᒫᕐᓗ ᐊᑐᖅᑐᓂᒃ ᑎᑎᕋᕐᕕᐅᕙᑦᑐᒥᓂᕐᓂ ᐃᖏᕐᕋᓂᕆᕙᑦᑕᒥᓂᖏᑦ ᓇᓕᐊᓐᓄᕋᖅᓱᑎᒃ ᐸᐸᑕᐅᒻᒪᑕ ᐅᓪᓗᒥ, ᐃᓚᖓᓪᓗ ᑎᑎᖅᑐᒐᖅᑕᐅᓯᒪᓪᓗᓂ ᑕᑯᒥᓇᖅᑑᓪᓗᓂ.
ᓅᕙᐃᒻᕙ 1867–ᒥ, ᐋᓐᑐᕉᔅ ᑭᓴᒃᑲᓐᓂᓕᕐᓂᕐᒥᔪᖅ ᑐᖏᓕᐊᓂ ᐊᕐᕌᒎᑉ ᓄᕗᒻᒥ, ᓴᓂᐊᓂ ᓇᐅᔭᖅᑕᓕᐅᑉ. ᐱᖅᓯᑎᓪᓗᒍ, ᑎᔾᔭᕐᓗᓄᑦ ᓯᑯᓄᑦ ᓴᕿᔭᒥᓂᖅ ᐅᔭᕋᓚᒻᒧᓪᓗ ᓄᓈᖅᑕᐅᑦᓱᓂ. ᑎᒥᖓᓗ ᐊᒻᒪᖅᓱᓂ. ᓱᕋᑦᑐᒥᓂᖅ, ᐊᑐᕋᑦᓴᐅᖏᓐᓂᖏᓐᓄᓪᓗ ᓯᒃᑯᐸᓪᓕᑎᓪᓗᒍ ᐅᖁᒪᐃᑦᑐᓂᒃ ᐅᓯᓕᖅᑐᕐᕕᒋᒋᐊᖓ ᐊᑲᐅᒐᓂ, ᐋᓐᑐᕉᔅ ᐅᒥᐊᓕᑦᑕᖏᑦ ᐊᑲᐅᓂᖅᓴᒨᕈᓐᓇᓂᖏᑦᑐᑦ. ᐃᓄᖏᑦ ᐅᒥᐊᕐᔪᐊᒥᐅᑕᒥᓃᑦ ᐅᓪᓗᓂᒃ ᖁᓕᓪᓗ ᐊᑕᐅᓯᕐᒥᒃ, ᓯᑯᑦᓰᓪᓗᑎᒃ, ᐅᓕᒐᐃᒻᒪᑦ ᐃᒻᒪᑦᑕᐃᓐᓇᕋᓗᐊᖅᑎᓪᓗᒍ ᓯᓂᕝᕕᖓᑕ ᓇᓛᒍᑦ. ᖃᐅᓰᔪᐃᓐᓇᐅᓕᖅᓱᑎᒃ, ᐊᒥᓱᓪᓗ ᐊᓯᖏᓐᓂᒃ ᐊᓐᓄᕌᕈᑎᑦᓴᖃᕋᑎᒃ, ᓂᐅᕋᐃᑦᓱᑎᒃ ᐃᓛᓂᐅᙱᑦᑐᖅ ᐅᓗᑦᓵᒨᕆᓐᓂᕐᒪᑕ ᐱᖁᑎᓕᒫᒥᓐᓂᒃ. ᐃᓄᐃᑦ ᓴᓂᐊᓂ ᐊᐅᓪᓛᖅᓯᒪᔪᑦ ᐃᑳᕈᓐᓇᓕᖅᑐᒥᓃᑦ ᓯᑯᒃᑯᑦ ᕿᒧᑦᓯᑦᓱᑎᒃ ᓅᕙᐃᒻᕙ 26–ᐅᑎᓪᓗᒍ. ᓄᑦᑎᖅᑕᒥᓂᖏᑦ ᐅᒪᓇᕐᔪᐊᒧᑦ, ᑐᙵᓱᑦᑎᓪᓗᒋᓪᓗ ᐊᒥᓱᑦ ᐊᖏᕐᕋᒥᓐᓂ ᓇᔪᒐᖃᑲᐃᓐᓇᑎᑦᓱᒋᑦ.
ᐋᑐᕉᔅ ᐅᒥᐊᓕᑦᑕᖏᑦ ᐊᖑᑎᑦ ᐅᑮᔪᒥᓃᑦ ᒪᕐᕉᓐᓂ ᐃᓪᓘᓐᓂ ᐱᕕᑭᑦᑑᓪᓗᑎᒃ ᐃᒃᑮᓇᖅᑑᓪᓗᑎᒃ ᓇᔪᖅᑕᖏᑦ. ᕿᔪᐊᕐᔪᖏᓐᓂ ᐅᒥᐊᕐᔪᐊᑉ ᓴᓇᔪᒥᓃᑦ ᐊᕕᓯᒪᔪᓕᐊᕆᓪᓗᒋᑦ ᐃᓂᒋᔭᐅᓂᐊᖅᑐᑦ ᐊᒻᒪᓗ ᐃᒻᒥᒃᑯᑦ ᓂᖅᓯᐅᕕᒻᒥᒃ ᓴᓇᓪᓗᑎᒃ. ᐊᓐᓇᑐᐅᐃᓐᓇᒥᓃᑦ. ᐸᓐᓂᖅᑑᑉ ᑲᖏᖅᓱᐊᓗᐊᓂ, ᐊᖑᑎᓂᒃ ᑐᖁᔪᖃᓗᐊᖅᐸᓂᙱᑦᑐᖅ ᐅᒥᐊᖏᑦ ᓄᓇᒦᑐᐊᕐᒪᑕ, ᑕᐃᒪᙵᓕᒫᕐᓗ ᓄᓇᒥᓐᓄᑦ ᐅᑎᕈᔾᔭᐅᕙᑦᓱᑎᒃ ᐊᐅᔭᕈᕋᐃᒻᒪᓐ ᐊᓯᐊᒍᑦ ᐅᒥᐊᒃᑯᑦ. ᐊᕐᕙᓂᐊᖅᑎᓄᑦ ᐅᒥᐊᕆᔭᐃᑦ ᐃᓂᒋᔭᑦᓴᐅᓗᐊᖅᐸᓂᖏᑦᑐᑦ ᐅᑭᐅᖅᐸᓪᓕᐊᑎᓪᓗᒍ ᖁᐊᕐᓇᖅᓯᑎᓪᓗᒍ, ᑭᓯᐊᓂ ᐃᓄᐃᑦ ᖃᓪᓗᓈᓪᓗ ᓄᓇᖅᑲᑎᒌᑦ ᐅᒦᔭᖅᑐᖃᖅᐸᑦ ᖃᐅᔨᓴᑦᓯᐊᐸᑦᑐᒥᓃᑦ ᑐᖁᓚᕿᔪᖃᕐᓂᐊᖏᒃᑲᓗᐊᕐᒪᖔᖅ ᐱᕐᓕᑦᑐᖃᕐᓂᐅᔭᖏᒃᑲᓗᐊᕐᒪᖔᕐᓗ ᐸᓐᓂᖅᑑᑉ ᑲᖏᖅᓱᐊᓗᐊᓂ.
ᐅᒦᔭᖅᑐᖃᕐᓂᖅᐸᑦ, ᑭᓯᐊᓂ, ᐊᔪᒃᓴᓕᕈᑎᕐᔪᐊᖅ ᑮᓇᐅᔭᑎᒍᑦ ᐃᑭᒪᔪᓕᒫᓄᑦ ᐅᒥᐊᒥ. ᐋᓐᑐᕉᔅ ᓇᓪᓕᐅᒃᑯᒫᖃᖅᑎᑕᐅᔪᒥᓂᐅᔪᒃᓴᐅᔪᖅ, ᑭᓯᐊᓂ ᐊᖑᑏᑦ ᐊᕐᕙᓂᐊᖅᑎᓄᑦ ᐃᖅᑲᓇᐃᔭᖅᑎᒋᔭᐃᑦ ᐊᑭᓕᖅᑕᐅᖃᑦᑕᖅᑐᒥᓃᑦ ᑮᓇᐅᔭᓕᐊᖑᔪᓂ ᐊᒡᒍᖅᑎᑕᐅᓪᓗᑎᒃ. ᐅᒥᐊᕐᔪᐊᖃᕉᓐᓃᖅᓱᑎᒃ ᐅᓯᔾᔪᑎᒃᓴᒥᒃ ᐅᖅᓱᒥᒃ ᓱᖅᑲᕐᓂᓪᓗ ᖃᓪᓗᓈᓄᑦ ᓂᐅᕕᕐᕕᓐᓄᑦ, ᑮᓇᐅᔭᓕᐅᕈᑎᑦᓴᖃᕐᓂᖏᑦᑐᑦ ᑕᒪᐅᙵ ᐃᖏᕐᕋᓐᓂᕋᓗᐊᕋᒥᒃ, ᐊᒥᓱᓪᓗ ᐅᑎᖅᑐᑦᓴᐅᕙᑦᑐᒥᓃᑦ ᐊᑭᓕᑦᓴᖃᓕᖅᓱᑎᒃ. ᐋᓐᑐᕉᑉ ᑳᐱᑕᐃᖓᑕ ᐊᑐᖅᑎᑕᒥᓂᖓ ᐅᒥᐊᒥᓂᖅ ᐱᐅᓕᓪᓗᒋᑦ ᐊᑭᑦᑐᕋᐅᑎᒍᑕᐅᑎᑦᓱᒋᓪᓗ ᓱᓇᒃᑯᑖᑦ ᐃᓚᒥᓂᖏᑦ ᐅᒥᐊᑉ, ᐅᓯᓕᖅᑐᖅᑕᐅᑎᑦᓯᓂᕐᒥᔪᑦᑕᐅᖅ ᐊᓪᓛᑦ ᐊᒥᐊᒃᑯᒥᓃᑦ ᑭᓪᓗᖅᑕᐅᑎᓪᓗᒋᑦ ᓇᐹᖅᑐᒥᓃᑦ ᖃᒧᑏᓐᓄᑦ ᐅᓂᐊᖅᑕᐅᓪᓗᑎᒃ ᐃᓪᓗᓄᑦ, ᐃᒻᒪᖄ ᕿᔪᒋᔭᐅᓂᐊᕐᒪᑕ ᐃᑯᐊᓚᖅᑯᑕᐅᓗᑎᒃ ᑭᐊᑦᓴᐅᑎᓄᑦ. ᑭᖑᓪᓕᖅᐹᒥ, ᓂᐅᕕᖅᑕᐅᑎᑦᓯᔪᒥᓂᖅ ᐅᒥᐊᒥᓂᕐᒥᒃ ᐊᓯᐊᓄᑦ ᒥᐊᓕᒐᐃᑦ ᐅᒥᐊᕐᔪᐊᖓᓄᑦ, ᒥᐅᓪᕗᑦᒧᑦ (Milwood ) ᐊᑭᖃᖅᑎᓪᓗᒍ $50–ᒥᒃ. ᑎᑎᕋᖅᑕᐅᓯᒪᙱᒃᑲᓗᐊᖅᑎᓪᓗᒍ ᑕᒪᓐᓇ ᑎᑎᕋᖅᑕᐅᓯᒪᔪᓂ, ᐃᒻᒪᖄ ᑕᐅᖅᓯᐅᑎᖃᖃᑦᑕᑐᑦᓴᐅᓂᕐᒥᔪᖅᑕᐅᖅ ᐃᓚᒥᓂᖏᓐᓂᒃ ᐅᒥᐊᕐᔪᐊᑉ ᐃᓄᓐᓄᑦ ᑕᐅᖅᓯᐅᑎᓪᓗᒋᑦ ᓄᑖᒥᓂᕐᓄᑦ ᓂᕿᓄᑦ, ᒥᖅᑯᓕᓐᓄᑦ, ᐅᑭᐅᖅᓯᐅᑎᓄᓪᓘᓐᓃᑦ ᐊᓐᓄᕌᓄᑦ. ᐅᒥᐊᒥᓂᐅᑉ ᐃᓚᖓ ᐱᒋᔭᐅᙱᑐᐊᖅᐸᑦ, ᐃᓄᐃᑦ ᓇᓗᓇᙱᑦᑐᖅ ᕿᓂᖅᐸᑦᑐᒥᓃᑦ ᕿᔪᓐᓂᒃ, ᑭᑭᐊᓂᒃ, ᐊᓯᖏᓐᓂᓪᓗ ᐊᑐᕈᓐᓇᕋᔭᖅᑐᓂᒃ.