ᐅᕙᓃᑦᑐᑎᑦ : ᐊᖏᕐᕋᖅ » ᓴᓪᓕᖅ
ᓴᓪᓕᖅ
ᓴᓪᓕᒥ ᐊᕐᕕᓕᕆᕕᒃ ᐊᐅᓚᔪᒥᓂᖅ ᐊᑯᓐᓂᖏᓐᓂ 1899 ᐊᒻᒪᓗ 1903 ᓇᒻᒥᓂᕆᔭᒥᓂᕆᓪᓗᓂᐅᓪᓗ ᕌᐳᑦ ᑭᓐᓂᔅ ᐊᒻᒪᓗ ᐃᕐᓂᕇᑦ ᑲᑉᐸᓂᖓᑕ ᑕᓐᑏᑉ. ᔮᓐ ᒧᕋᐃ ᐱᒋᐊᖅᑎᑕᒥᓂᖓ ᐊᐅᓚᑕᒥᓂᕆᓪᓗᓂᐅᓪᓗ. ᐃᑲᔪᖅᑎᖃᖅᓱᓂ ᖃᑕᙳᑎᒥᓂᒃ, ᐋᓕᒃᓵᓐᑐ ᒧᕋᐃ ᓄᑲᖅᓯᕐᒥᒃ, ᑳᐱᑕᐃᖓ ᐅᒥᐊᕐᔪᐊᑉ ᐋᑎᕝ, ᐃᓄᓐᓂᒃ ᓯᒃᑳᑦᓯᓂᓪᓗ ᐱᓕᕆᔨᖁᑎᖃᕈᓐᓇᖅᓯᔪᒥᓂᖅ ᕿᑭᖅᑖᓘᑉ ᑯᐸᐃᓪᓗ ᑕᕐᕌᖓᑕ ᐃᑭᕋᓴᖓᓃᙶᖅᓯᒪᔪᓂᒃ ᑲᖏᖅᓱᐊᓗᒻᒥᓪᓗ ᐊᕐᕕᓕᕆᕕᐅᑉ ᐊᕐᕌᒍᑕᒫᑦ ᐊᐅᓚᕙᑦᑕᖏᑦ ᐊᐅᓚᑕᐅᑦᓯᐊᖁᓪᓗᒋᑦ.
ᓴᓪᓕᒦᑦᑐᖅ ᐊᕐᕕᓕᕆᕕᒃ ᐊᓯᔾᔨᐸᓪᓕᐊᓂᕐᒧᑦ ᑐᕌᕈᑕᐅᓂᖓ ᓇᓗᓇᐃᖅᓯᓯᒪᔪᖅ ᐃᓄᖏᓐᓄᑦ. ᓯᕗᓂᖓᒍᑦ 1899, ᓴᓪᓕᒥᐅᑦ, ᑕᐃᔭᐅᕙᓐᓂᕐᒥᔪᖅᑕᐅᖅ ᐳᔭᐃᑦ, ᑖᒃᑯᑐᐊᖑᕙᑦᑐᒥᓃᑦ ᐊᓯᖏᓐᓂ ᐃᓄᐃᑦ ᐅᖓᓯᑦᓴᖅᓱᓂᓗ ᑲᖏᖅᓱᐊᓗᒻᒥᒃ ᐊᕐᕕᓂᐊᕐᓂᐅᕙᑦᑐᓂᒃ. ᑕᒫᓃᖏᓐᓇᕐᓂᐊᓕᖅᑎᓪᓗᒋᑦ ᓴᖅᑭᖅᑎᑕᐅᓯᒪᔪᑦ ᖃᓪᓗᓈᓄᑦ ᑕᒫᓂ ᓄᓇᖓᓂ ᐊᕐᕕᓕᕆᕕᒻᒧᓪᓗ ᑎᑭᑉᐸᓕᖅᑐᑦ ᐊᐅᓚᐸᒃᓱᑎᒃ ᐊᓯᔾᔩᓪᓚᕆᑦᑐᒥᓃᑦ ᐊᓐᓇᐅᒪᓇᓱᐊᕈᓯᖏᓐᓂ. ᒪᓕᒃᓱᒋᑦ ᐊᑕᐅᓯᐅᙱᑦᑐᒧᑦ ᐅᖃᐅᓯᐅᓯᒪᔪᑦ, ᐃᓚᒋᔭᐅᓪᓗᓂ ᑳᐱᑕᐃ ᔪᐊᔾ ᑰᒧ, ᑲᑎᖃᑦᑕᕐᓂᖓ ᑖᒃᑯᐊ ᓴᓪᓕᒥᐅᑦ ᐃᓄᐃᓪᓗ ᐊᓯᖏᑦ ᑕᒫᓂᒥᐅᖑᙱᑦᑐᑦ (ᐃᓄᐃᑦ ᖃᓪᓗᓈᓪᓗ ᐅᒥᐊᖅᑐᖅᑏ) ᐃᓚᒍᑕᐅᓯᒪᔪᑦ ᐱᑕᐃᕈᑎᑲᓴᓐᓂᖏᓐᓄᑦ. ᑳᐱᑕᐃ ᑰᒧ ᐅᑎᕋᒥ ᓴᓪᓕᒧᑦ ᐊᐅᓚᒃᓯᔨᐅᓪᓗᓂ ᐃᐅᕋᒧᑦ ᐊᐅᔭᖓᓂ 1903, ᖃᐅᔨᔪᒥᓂᖅ ᓱᑲᑦᑐᒥᒃ ᐊᓯᔾᔨᖅᑐᒥᒃ:
... ᑳᐱᑕᐃ ᑰᒧ ᖃᐅᔨᔪᒥᓂᖅ ᐊᐃᕕᓕᖕᒥᐅᒥᒃ ᓴᓪᓕᐅᒥᐅᑦ ᐋᒡᒐᐅᒐᓗᐊᖅ ᐊᑕᐅᓯᖅ ᐊᕐᓇᖅ ᓯᑕᒪᓗ ᓱᕈᓰᑦ ᑐᖁᓐᓂᕆᐊᖏᑦ (ᐃᐅᕋ (Era) 1903– 1905: 9 ᐊᐅᒡᒍᓯ 1903) ᑖᒃᑯᐊ ᐊᓐᓇᑦᑐᒥᓃᑦ ᐅᒥᐊᕐᔪᐊᒃᑯᑦ ᐋᒃᑎᕝᑯᑦ ᓇᐅᔮᓕᐊᕈᔾᔭᒥᓃᑦ, ᐊᕐᓇᖅ ᑕᐃᓐᓇ ᑐᖁᔪᒥᓂᖅ ᑕᒫᓂ 1907–ᒥᒃᓯᑎᓐᓂ, ᐊᐃᑯᓕᖕᒥᐅᓄᓪᓗ ᑎᒍᐊᖅᑖᖑᓂᑯᐃᑦ ᑕᐃᒃᑯᐊ ᓱᕈᓰᑦ. (Ross 1975: 116)Â