ᐅᕙᓃᑦᑐᑎᑦ : ᐊᖏᕐᕋᖅ » ᓯᖓᐃᔭᖅ
ᓯᖓᐃᔭᖅ
126 Ko
ᑲᐃᑉ ᕼᐊᐃᕙᓐ ᐊᖅᕕᒐᓱᐊᖅᕕᒃ (ᓯᖕᓄᓚ ᐳᐃᓐᑦ, ᓯᖓᐃᔭ, ᓄᒍᒥᐅᑦ, ᓂ
ᖃᐅᔨᒪᔭᐅᖃᓯᐅᑎᒻᒥᔪᖅ ᖃᓪᓗᓈᓄᓐ ᑖᓐᓇ ᒪᑯᑎᒎᓇ ᑲᐃᑉ ᕼᐊᐃᕙᓐ (Cape Haven), ᓯᖑᓚᐅ ᓄᕗᐊ (Singnula Point), ᓯᙱᔭ (Singnija), ᓄᒍᒥᐅᑦ (Nugumiute), ᓂᐅ ᒍᒻᒥᐅᑦ ᐸᐃ (New Gummiute Bay), ᐊᓯᖏᓐᓂᓪᓗ.
ᓯᖓᐃᔭᖅ ᐃᓄᓐᓄᑦ ᐊᐅᓪᓛᖅᓯᒪᕕᐅᕙᑦᑐᕕᓂᖅ ᐊᕐᕕᓂᐊᖅᑏᑦ ᑎᑭᓚᐅᙱᓐᓂᖏᓐᓂ. ᓂᒋᐊᓃᑦᑐᖅ ᐸᓐᓂᖅᑑᑉ ᑲᖏᖅᓱᐊᓗᐊᑕ, ᑕᒫᓂ ᓯᔾᔭᖓᓂ ᖃᓂᒋᔭᖓ Cyrus Field Bay. ᒥᐊᓕᒐᒥᐅᑦ ᐊᕐᕙᓂᐊᖅᑏᑦ ᑕᒫᓂ ᐊᕐᕙᓕᕆᕙᑦᑐᕕᓃᑦ 1860–ᒧᓄᑦ. ᐊᕐᕙᓕᕆᕕᒋᕙᓐᓂᐊᑕᒥᓐᓂᒃ ᓇᑉᐸᐃᔪᒥᓃᑦ ᑲᓇᓐᓇᖅᐸᓯᖓᑕ ᓄᕗᐊᓂ ᓯᖓᐃᔭᐅᑉ, ᖃᖅᑲᐃᓐᓇᐅᓂᖓᓂ ᕿᑭᖅᑕᐅᑉ ᐊᑦᓯᖅᑕᒥᓂᕐᒥᓐᓂᒃ Cape Haven–ᒥᒃ. ᐊᕐᕕᖃᑦᓯᐊᓂᙱᑦᑑᒐᓗᐊᖅ, ᑭᓯᐊᓂ ᓄᕗᐊ ᖃᖅᑲᓕᐊᕕᒋᔭᕆᐊᖓ ᐊᑲᕆᔭᐅᕙᑦᑐᕕᓂᖅ ᐊᕙᒻᒧᑦ ᑕᑯᕕᑦᓴᐅᑦᓯᐊᕐᓂᖓᓄᑦ. ᐊᕐᕙᓂᐊᖅᑏᑦ ᐅᒥᐊᖏᑦ ᑕᓯᐅᔭᕐᔪᐊᓕᐊᖅᐸᓪᓕᐊᔪᑦ ᐅᑮᓕᖅᑭᓚᐅᓪᓚᐸᑦᑐᕕᓃᑦ ᑕᒫᓂ ᓯᑯ ᓯᖁᑦᑎᐸᓐᓂᒥᒻᒪᓐ ᐊᑐᕋᑦᓴᐅᒍᓐᓃᖅᓱᓂ ᐅᑭᐅᖅᐸᓪᓕᐊᓕᖅᑎᓪᓗᒍ.
109 Ko
ᓴᕕᐊᓚᒻ ᑕᐅᖅᓯᕋᑏᑦ ᑳᑉᐸᓂᖓᓐ, ᑕᐃᖅᓯᕋᖅᕕᒃ ᓯᖓᐃᔭᒥ, ᑲᐃᑉ ᕼ&#
ᓯᖓᐃᔭᖅ ᑲᑎᕝᕕᐅᕙᑦᑐᕕᓂᖅ ᐊᒥᓱᓄᑦ ᐃᓄᓐᓄᑦ. ᐃᓚᒌᑦ ᐅᖓᓯᑦᑐᒦᙶᖅᓯᒪᔪᑦ ᕿᑭᖅᑖᓘᑉ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓᓃᙶᖅᓯᒪᔪᑦ ᑎᑭᑉᐸᓂᕐᒪᑕ ᐃᖅᑲᓇᐃᔭᕆᐊᖅᓱᑎᒃ ᐊᕐᕙᓂᐊᖅᑎᓄᑦ. ᐃᓄᐃᑦ ᐅᐊᖕᓇᖓᓃᓐᓂᖅᓴᐃᑦ ᐸᓐᓂᖅᑑᑉ ᑲᖏᖅᓱᐊᓗᐊᓂ ᐊᒃᑐᐊᓂᖃᕐᓂᕐᒥᔪᑦᑕᐅᖅ ᑕᕝᕗᖓ ᐊᕐᕕᓕᕆᕕᒻᒧᑦ. 1880–ᖑᓕᕋᑖᖅᑎᓪᓗᒍ, ᐊᕝᕙᓪᓗᐊᑲᓴᖏᑦ ᐃᓅᓕᖅᑐᒥᓃᑦ ᑕᒫᓂ.
ᓯᖓᐃᔭᒥ ᐊᕐᕕᓕᕆᕕᒃ ᒪᑐᔭᐅᑲᐃᓐᓇᖅᑐᕕᓂᖅ ᐊᐅᒡᒍᓯᐅᑎᓪᓗᒍ 1896–ᒥ, ᑭᖑᓂᖓᒍᑦ ᒥᐊᓕᒐᕐᒦᙶᖅᓯᒪᔪᖅ ᐊᐅᓚᑦᓯᔨ ᐊᕐᕕᓕᕆᕕᒻᒥᒃ, ᑳᐱᑕᐃ ᑎᒧᑎ ᑭᓕᔅᐱ (Timothy Clisby), ᑐᖁᔪᒥᓂᐅᑎᓪᓗᒍ ᐃᖃᓪᓕᐊᖅᓯᒪᑦᓱᑎᒃ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ. ᓯᑕᒪᑦ ᐃᓄᐃᑦ ᒪᕐᕉᓪᓗ ᖃᓪᓗᓈᒃ ᑭᕕᖃᓯᐅᑎᔪᒥᓃᑦᑕᐅᖅ. ᐊᕐᕌᒍᕐᒥᒻᒪᓐ, 120 ᐃᓄᐃᑦ ᓯᖓᐃᔭᒥᓂᒥᓃᑦ ᓄᑦᑎᖅᑐᒥᓃᑦ ᐅᒪᓇᕐᔪᐊᒧᑦ, ᐊᒥᓱᑦ ᐃᓚᖃᕐᕕᖓᑦ. ᐃᓘᓐᓇᑎᒐᓚᒃ ᐅᑎᖅᑐᒥᓃᑦ ᓯᖓᐃᔭᒧᑦ ᒪᑐᐃᖅᑕᐅᓕᖅᑭᒻᒪᓐ ᐊᕐᕕᓕᕆᕕᒃ.
ᓯᖓᐃᔭᖅ ᑭᖑᓪᓕᖅᐹᒥᓂᖅ ᓇᐸᓪᓗᓂ ᒥᐊᓕᒐᕐᒦᙶᓯᒪᔪᓄᑦ ᐊᕐᕕᓕᕆᕕᐅᑦᓱᓂ ᐸᓐᓂᖅᑑᑉ ᑲᖏᖅᓱᐊᓗᐊᓂ. ᑕᒫᓂᒐᓚᒃ 1905–ᒥ, ᐱᒋᓕᐅᔾᔭᐅᖃᓯᐅᑎᓐᓂᕐᒥᔪᖅᑕᐅᖅ ᓯᒃᑳᑦᓯᓄᑦ. ᐊᐅᓚᑦᓯᔨᖅᑖᖅᑲᐅᒥᓂᖓ ᐋᔅᐳᑦ ᑭᓕᐅ ᕗᐊᓯᔅ-ᒍᕌᑦ (Osbert Clare Forsyth-Grant), ᐃᓄᓐᓄᑦ ᖃᐅᔨᒪᔭᐅᕙᑦᑐᕕᓂᖅ ᒥᓯᑕ ᒍᕌᑦᒥᒃ, ᐅᕝᕙᓘᓐᓃᑦ ᒥᑦᓯᒐᒥᒃ. ᓯᖓᐃᔭᒥᐅᖑᖃᑎᑲᖅᑐᒥᓂᖅ ᓇᖏᐊᕈᕐᒥᒃ, ᓄᓕᐊᖓ ᐃᖅᑲᓇᐃᔭᖅᑎᖁᑎᒥᓂᖓᑕ ᒎᑎᓕᐊᖅᑑᑉ. ᒥᑦᓯᒐ ᕿᑐᕐᖓᖅᑖᖃᑎᓕᒥᓂᖅ ᓇᖏᐊᕈᕐᒥᒃ, ᐃᙵᓚᓕᐊᖅᑎᑦᓯᓂᕐᒥᔪᖅᑕᐅᖅ ᕿᑐᕐᖓᒥᓂᒃ, ᐊᐃᓂᐊᒥᒃ. ᑖᓐᓇ ᓂᕕᐊᖅᓯᐊᖅ ᓂᑦᓯᑦᑕᕆᐅᖅᑐᒥᓂᖅ ᐃᙵᓚᒦᑦᓱᓂ, ᑭᖑᓂᖓᒍᑦ ᐃᕐᖑᑕᕐᒥᓂᒃ ᐃᓕᓐᓂᐊᑎᑦᓯᔪᒥᓂᖅ ᓂᑦᓯᑕᕐᓂᕐᒥᒃ, ᒥᐊᓕ ᐊᐃᐱᓕᒥᒃ ᐃᖃᓗᒻᒥᐅᒥᒃ.
ᒥᑦᓯᒐ ᑲᔪᓯᑦᓯᐊᕐᓂᖃᕐᓂᖏᑦᑐᕐᓗᑭᐊᖅ ᑳᐱᑕᐃᖑᓂᕐᒥᓘᓐᓂᑦ ᖃᐅᔨᒪᑦᓯᐊᖏᑦᑐᕕᓂᐅᒍᓂ. 1908–ᖑᑎᓪᓗᒍ, 65–ᓂᒃ ᐃᓄᓐᓂᒃ ᓯᖓᐃᔭᒦᙶᖅᓯᒪᔪᓂᒃ ᐱᓕᕆᔨᓕᕕᓂᖅ ᐅᒥᐊᕐᔪᐊᒥᓂ ᓯᖁᑦᑎᖅᑐᒥᓂᕐᒥᒃ ᐊᖅᑯᓇᖅᑎᓪᓗᒍ ᐅᖓᓯᒋᔭᖓᓂᖃᐃ ᑕᒫᓂ 90 ᒪᐃᓕᓂᒃ ᐊᕐᕕᓕᕆᕕᐅᑉ. ᐃᓄᐃᑦ ᑐᑉᐱᐊᕆᑦᓴᐅᑎᒋᔭᒥᓂᖓ ᑎᖏᕐᕋᐅᑕᒥᓂᖓ ᑕᒃᓱᒪ ᐅᒥᐊᑉ, ᐅᖅᓱᐃᓪᓗ ᐅᒥᐊᕐᔪᐊᒦᑦᑐᕕᓃᑦ ᐅᖅᓱᕆᓕᐅᑎᓕᖅᓱᒋᑦ ᐅᑭᐅᓕᒫᖅ ᐃᑭᑉᐸᑦᓱᓂᔾᔪᒃ ᑭᐊᖃᖁᓪᓗᒍ, ᐃᓅᔾᔪᑕᐅᓪᓗᑎᒃ ᑖᒃᑯᓄᖓᓕᒫᖅ. ᐊᕐᕌᒍᐃᑦ ᐱᖓᓱᑦ ᐊᓂᒍᑐᐃᓐᓇᑎᓪᓗᒋᑦ, ᒥᑦᓯᒐᐅᑉ ᐅᒥᐊᕐᔪᐊᖓᑕ ᑐᖏᓕᐊ, ᐊᑎᓕᒃ Seduisante–ᒥᒃ, ᐃᖏᕐᕋᖃᑦᑕᖅᑐᒥᓂᖅ ᑐᔮᓂ ᕿᑭᖅᑖᓘᑉ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓᓂ. ᖃᓪᓗᓈᑦ ᐅᒥᐊᕐᔪᐊᒥᐅᑕᐃᑦ ᐅᒥᐊᒦᒍᒪᓂᖏᑦ ᑭᓪᓚᓕᒻᒥ ᐃᒻᒪᑦᑕᖅᑐᒦᑦᑐᒥᓃᑦ, ᑭᓯᐊᓂ ᐊᓄᕆᓕᕐᓂᕐᒪᓐ ᐅᓐᓄᑦᑎᓪᓗᒍ ᐊᖅᑯᓇᓕᕐᒪᑦ ᐅᒥᐊᕐᔪᐊᒦᑦᑐᓕᒫᑦ ᑐᖁᔪᒥᓃᑦ ᐊᓯᐅᓪᓗᑎᒃ ᐃᒫᓄᑦ. ᐊᕙᑏᑦ ᐱᖓᓱᑦ ᐊᑕᐅᓯᕐᓗ ᐃᓄᐃᑦ ᐃᑭᒪᖃᓯᐅᑎᔪᒥᓃᑦ ᐅᒥᐊᕐᔪᐊᒥ. ᓄᓈᕈᓐᓇᖅᓯᔪᒥᓃᓪᓕ ᑖᒃᑯᐊ, ᐅᑮᒋᐊᖃᓕᖅᓱᑎᒃ ᑕᒫᓂ, ᐅᐱᕐᖓᑦᓵᖓᓂ ᐅᒥᐊᖅᑐᓯᓐᓂᕐᒥᔪᑦ ᑭᙵᕐᓄᑦ.
ᑐᖁᓚᐅᖅᑎᓪᓗᒍ ᒥᑦᓯᒐ, ᓴᐱᓪᓚᒻ (Sabellum) ᓂᐅᕕᖅᑎᒃᑯᖓ ᓯᑳᓚᒻᒥᐅᖅ ᓂᐅᕕᖅᑐᕕᓂᖅ ᓯᖓᐃᔭᒥᒃ ᑕᐅᖅᓰᖃᑦᑕᕐᕕᐅᖁᑦᓱᓂᐅᒃ. 1923–ᒥ, ᓂᐅᕕᐊᕆᔭᐅᑎᑕᒥᓂᖓ ᓂᐅᕕᖅᑎᑯᓐᓄᑦ (ᕼᐊᑦᓴᓐ ᐸᐃᑯᑦ), ᕿᓚᒥᐊᓗᓪᓗ ᐊᐅᓚᑦᓯᓕᖅᓱᑎᒃ ᐸᓐᓂᖅᑑ ᑲᖏᖅᓱᐊᓗᐊᓂ. ᓂᐅᕕᖅᑎᒃᑯᑦ ᑕᐅᖅᓰᔨᖏᑦ ᑎᕆᒐᓐᓂᐊᖅᑖᕈᒪᔪᒥᓃᑦ, ᑕᐃᒪᐃᓐᓂᖓᓄᑦ ᐃᓄᐃᑦ ᓯᖓᐃᔭᒥᐅᑦ ᓄᑦᑎᓕᕐᓂᕐᒥᔪᑦ ᒥᑭᒋᐊᕐᓂᐊᕕᒃᓴᑦᓯᐊᕙᐅᓂᖅᓴᒧᑦ.
ᐃᓄᐃᑦ ᐅᐸᒍᑏᓐᓇᖃᑦᑕᖅᑐᕕᓃᑦ ᑕᒪᐅᖓ ᐃᓂᒋᔭᐅᕙᑦᑐᕕᓂᕐᒧᑦ ᐊᐅᓪᓛᖅᓯᒪᔪᓄᑦ. ᐸᐸᑦᓯᔪᒥᓃᑦ ᐊᕙᑎᑦ ᑯᓕᓪᓗ ᐃᙱᑎᑦᓯᒍᑎᓂᒃ, ᐃᒻᒪᖄ ᐱᔭᒥᓂᕐᒥᓐᓂᒃ ᒥᑦᓯᒐᒥᒃ, ᐱᑐᖃᕐᒥ ᐃᓪᓗᕋᓛᓕᐊᕆᓯᒪᔪᒥᒃ ᐱᒐᓚᒃᑯᕕᒋᑦᓱᒍ ᐃᙱᑎᑦᓯᐅᑎᓂᒃ. ᑖᓂᓯᖅᑎᑦᓯᕙᑦᓱᑎᒃ ᒧᒥᖅᑎᑦᓯᓪᓗᑎᒃ ᑕᕝᕙᓂ ᑐᒃᑐᓕᐊᖅᐸᓪᓕᐊᔪᓂᒃ ᐊᐅᔭᑕᒫᑦ. ᓯᐱᓪᓚᒻ ᓂᐅᕕᖅᑎᖏᑦ ᕿᒪᐃᖃᓯᐅᑎᑦᓂᕐᒥᔪᑦ ᐃᓪᓗᓯᐅᑎᓂᒃ ᐊᒡᓛᓘᓐᓃᑦ ᖃᑦᑕᐅᔭᓂᒃ ᐅᖅᓱᖅᑕᖃᐅᖅᑐᓂᒃ ᓯᖓᐃᔭᐅᑉ ᐊᕐᕕᓕᕆᕕᖓᓂ. ᐃᓄᐃᑦ ᐊᒃᑐᓂᖏᑕᖏᑦ ᐊᕙᑎᑲᓴᓐᓂᒃ ᐊᕐᕌᖑᓂᒃ, ᐅᑕᖅᑭᔪᒥᓃᑦ ᖃᓪᓗᓈᑦ ᐅᑎᕐᓂᐊᕐᓂᖏᓐᓂᒃ. ᐊᓱᐃᓪᓛᓕ, ᑕᒫᓂᒐᓚᒃ 1939–ᒥ, ᓱᕋᐃᔭᓕᑕᐃᓐᓇᖅᑐᒥᓃᑦ ᐃᓄᐃᑦ ᑖᒃᑯᓇᖓᑦ ᐱᖓᓱᓂᒃ ᐊᕐᕕᓕᕆᕕᐅᕙᑦᑐᕕᓂᕐᓂᒃ. ᕿᔪᓐᓂᒃ ᐊᑐᖅᑎᑦᓯᓕᖅᓱᑎᒃ ᖃᓇᒋᓪᓗᓂᒋᑦ ᓇᑎᕆᓪᓗᓂᒋᓪᓗ.