ᐅᕙᓃᑦᑐᑎᑦ : ᐊᖏᕐᕋᖅ » ᑲᓈᑲ
ᑲᓈᑲ
ᐃᓄᒃ ᐊᖑᓇᓱᑦᑎ ᑕᐅᖅᓯᕋᖅᑎᐅᓪᓗᓂᓗ ᑲᓈᑲ ᐱᒻᒪᕆᐅᓚᐅᖅᑐᖅ ᑐᑭᓯᖃᑎᒌᑦᑎᑦᑎᔨᐅᓪᓗᓂ ᐊᖅᕙᒐᓱᐊᖅᑎᓂᒃ ᐃᓄᓐᓂᓪᓗ 1900 ᐊᕐᕌᒍᐃᑦ ᐊᑐᓕᕋᑖᖅᑎᓪᓗᒋᑦ. ᖃᐅᔨᒪᔭᐅᓂᖓ ᑕᒫᓐᖔᖅᐳᖅ ᐅᒥᐊᕐᔪᐊᑦ ᑎᑎᖅᑲᑯᑎᒥᓂᖏᓐᓂᒃ ᑕᐃᔅᓱᒪᓂ. ᐃᓅᔪᒥᓂᖅ 1855ᕈᔪᒻᒥ, ᑲᐃᑉ ᕼᐊᐃᕙᓐ ᓴᓂᐊᓂᐅᔪᔅᓴᐅᔪᖅ, ᑭᖑᓂᑦᑎᐊᖓᓂ ᐊᖅᕕᖓᓱᐊᖅᑏᑦ ᐅᒥᐊᕐᔪᐊᑦ ᐅᑭᐊᓪᓕᖃᑦᑕᕆᐊᓕᖅᑐᒥᓂᐅᑎᓪᓗᒋᑦ ᓄᓇᒦᑦᑐᑎᒃ. ᐃᕐᓂᕆᔭᐅᓂᕋᖅᑕᒥᓂᖅ ᐃᓪᓕᕐᒧᓐ ᐊᐃᔪᐊᔅᒥᐅᑕᕐᒧᓐ ᐊᖅᕕᒐᓱᐊᖅᑎᒧᓐ, ᐳᐊᔾᔪᒍᒥᐅᑕᖅ ᐃᓐᖓᓚᑖᖅᑲᐅᒥᐅᑕᕐᒥ ᐅᒥᐊᕐᔪᐊᕐᒥᐅᑕᖅ. ᑲᓈᑲ ᖃᐅᔨᒪᔭᐅᔪᖅ ᐅᑉᐱᓂᕐᒧᓐ ᓵᒋᐊᕈᒪᓐᓂᖏᓐᓂᖓᓄᑦ ᐊᔪᕆᖅᓱᐃᔨᓄᑦ ᓵᒋᐊᖅᑎᑕᐅᒐᓱᐊᖃᑦᑕᑎᓪᓗᒍ, ᑭᓯᐊᓂᓕ ᑎᑎᕋᖅᑕᐅᓯᒪᒻᒥᔪᖅ ᓵᒋᐊᖅᑐᒥᓂᐅᒋᐊᖓᓂᒃ ᐅᑉᐱᓂᕐᒧᓐ 1903ᕈᔪᒻᒥ.
ᐃᓅᓱᓐᓂᓴᐅᓪᓗᓂ ᓄᓇᖃᖅᑐᓂ ᐃᖅᑲᓇᐃᔭᖅᑐᓂᓗ ᐆᒻᒪᓇᕐᔪᐊᕐᒥ, ᑲᓈᑲ ᐃᓕᒃᑲᔭᖅᑐᒥᓂᖅ ᐅᖃᖃᑎᖃᕈᓐᓇᓂᕐᒥᒃ ᐊᖅᕕᒐᓱᐊᖅᑎᓂᒃ ᖃᓪᓗᓈᑎᑐᑦ ᐃᓄᑦᑎᑐᑦ ᐃᓚᐅᖅᓯᒪᔪᓂᒃ ᐅᖃᐅᓯᖃᖅᑐᓂ ᑕᐃᔅᓱᒪᓂ ᑕᐃᒫᒃ ᐅᖃᖃᑎᒌᑉᐸᓂᕐᖓᑕ ᐃᓄᐃᑦ ᖃᓪᓗᓈᓪᓗ. 1903ᒥ ᑲᓈᑲ ᐊᐃᑉᐸᖃᖅᑐᓂ ᐊᓯᒥᓂᖅ ᐃᓄᒻᒥᒃ ᐊᖅᕕᒐᓱᐊᖅᑎᒥᑦᑕᐅᖅ ᐅᕿᑦᑐᕐᒥᒃ ᐃᓚᒥᓂᒃ ᐊᐅᓪᓛᖃᑎᓕᒥᓃᒃ ᐃᒐᕐᔪᐊᕐᒧᓐ ᒥᑦᑎᒪᑕᓕᐅᓕᖅᑑᑉ ᓴᓂᐊᓄᑦ ᐊᖅᕕᒐᓱᒋᐊᖅᑐᑎᒃ ᓯᒃᑳᑦᑎᒃᑯᓐᓄᑦ ᐃᖅᑲᓇᐃᔭᖅᑐᑎᒃ. ᑕᐃᒪᓕ ᖃᐅᔨᔪᒥᓃᑦ ᑕᒫᓂ ᐊᖅᕖᑦ ᐊᒥᓲᓗᐊᕈᓐᓃᖅᑐᒥᓃᑦ, ᑭᓯᐊᓂᓕ ᑲᓈᑲᐅᑉ ᐊᖑᓇᓱᒍᓐᓇᕐᓂᐊᓗᐊ ᐃᑲᔪᒻᒪᕆᑦᑐᒥᓂᖅ ᓇᒻᒥᓂᖃᐅᑎᐅᑉ ᐱᒐᓱᓐᓂᖏᓐᓂᒃ ᐊᓯᖏᓐᓂᒃ ᑕᒪᒃᑯᓂᖓ ᑑᒑᕐᓂᒃ ᐊᒥᕐᓂᓪᓗ. ᑕᒫᓃᑦᑐᓂᓕ ᒥᑦᑎᒪᑕᓕᐅᑉ ᓴᓂᐊᓂ ᐊᖑᓇᓱᑦᑎᒋᔭᐅᓐᓂᕐᒥᔪᖅ ᖃᐅᔨᒪᔨᑕᐅᓪᓗᓂᓗ ᔫᓯᑉ ᐃᐊᓪᓴᐅ ᕗᓈᑦ 1906ᒥ 1907ᒧᓐ ᖃᐅᔨᓴᕆᐊᖅᓯᒪᓂᒥᓂᖓᓂ.
ᑕᐃᒪᓕ ᐃᒐᕐᔪᐊᖅ ᐊᖅᕕᒐᓱᐊᖅᕕᒃ ᒪᑐᒻᒪᓐ 1910ᒥ, ᑲᓈᑲ ᐊᐅᓪᓛᖅᑐᒥᓂᖅ ᕿᕕᑦᑑᒧᓐ ᐊᒻᒪᓗ ᑭᖑᓂᐊᒍᑦ ᑲᐃᑉ ᒨᓰᒧᓐ ᑎᓂᔾᔪᐊᕕᒻᒥ, ᐃᖅᑲᓇᐃᔭᐃᓐᓇᖅᑐᒥᓂᐅᓪᓗᓂ ᓯᒃᑳᑦᑎᒃᑯᑦ ᐊᖅᕕᒐᓱᐊᖅᑎᖓᓄᑦ ᔭᐃᒻᔅ ᐃᐊᔅ ᒪᑦᔅ. ᕿᕕᑦᑑᒥ ᑲᐃᑉ ᒨᓰᒥᓗ, ᑲᓈᑲ ᐱᒋᐊᖅᑎᑦᑎᔪᒥᓂᖅ ᓂᐅᕕᕆᐊᖅᕕᓂᑦ ᑳᑉᑕᓐ ᒪᑦᔅᒧᓐ ᐊᒻᒪᓗ ᑯᐃᓐ ᓄᓇᖓᓐᓂᒥᐅᑕᐃᑦ ᑕᐅᖅᓯᕋᐅᑎᔨᖓᓄᑦ ᐅᒥᐊᕐᔪᐊᕐᒥᐅᑕᐅᕕᒋᔭᒥᓄᑦ. ᐊᑯᓂᑲᓪᓚᕈᓗᒃ ᑕᒪᓐᓇ ᓄᓇᖓ ᐅᒥᐊᕐᔪᐊᕐᒥᐅᑕᓄᑦ ᖃᐅᔨᒪᔭᐅᕙᑦᑐᒥᓂᖅ ᑲᓈᑯᕐ ᐅᕝᕙᓘᓐᓃᑦ ᑲᓈᑰᑉ ᕿᒪᕉᒪᓂᖓ, ᑭᓯᐊᓂᓕ ᐊᑎᖅ ᑖᓐᓇ ᓄᓇᓐᖑᐊᓪᓚᕆᓐᓂ ᐊᑐᖅᑕᐅᑯᑖᓐᓂᖏᑦᑐᖅ.
1920ᖏᓐᓂᓕ ᕼᐊᑦᓴᓐ ᕙᐃ ᑳᑉᐸᓂᒃᑯᑦ ᐃᓄᑑᔾᔨᒍᒪᓂᕐᒥᓂᒃ ᐅᑭᐅᖅᑕᖅᑐᒥ ᑕᐅᖅᓯᕋᖅᑐᓂᒃ ᓴᖅᑭᔮᖅᑎᑦᑎᕙᓪᓕᐊᓕᖅᑐᒥᓃᑦ, ᐊᒻᒪᓗ ᑲᓈᑲ ᐃᓐᓇᑐᖃᐅᓕᖅᑐᓂ ᑕᐅᖅᓯᕋᖃᑦᑕᖅᑐᒥᓂᖅ ᐃᖏᕐᕋᔭᒐᑉᐸᑦᑐᓂᓗ ᑎᓂᔾᔪᐊᕕᒻᒥ.
ᑎᑎᕋᖅᑕᐅᓯᒪᔪᖅ ᒪᓕᑦᑐᒋᑦ ᐱᓕᑉ ᒎᑦᕆ (ᒎᑦᕆ 2000) ᑎᑎᕋᖅᑕᒥᓂᖏᑦ. ᓇᓗᓇᐃᖅᑐᐃᒍᑎ ᑲᓇᑕᒥ ᐃᓅᕙᑦᑐᒥᓂᕐᓂᒃ ᖃᕋᓴᐅᔭᒃᑯᑦ ᓴᖅᑭᖅᑎᒐᔅᓴᐃᑦ.