ᐅᕙᓃᑦᑐᑎᑦ : ᐊᖏᕐᕋᖅ » ᐃᐲᕐᕕᒃ ᐊᒻᒪᓗ ᑕᖁᓕᑦᑐᖅ
ᐃᐲᕐᕕᒃ ᐊᒻᒪᓗ ᑕᖁᓕᑦᑐᖅ
ᖃᐅᔨᒪᔭᐅᖃᓯᐅᑎᒻᒥᔫᒃᑕᐅᖅ ᖃᓪᓗᓈᓄᑦ ᐃᒫᒃ ᐃᐊᓯᑭᒨ ᔫ (Esquimau Joe), ᐃᐴᕐᐱᖕ (Ebierbing), ᐃᐱᐅᐱ (Epiopee), ᑕᒪᒃᑯᑎᒎᓇ ᐊᒻᒪᓗ ᑑᑰᓕᑐᒥᒃ (Tookoolito), ᕼᐋᓇ (Hannah), ᑖᒃᕆᑑ (Tackritow.
ᐃᐲᕐᕕᒃ ᐊᒻᒪᓗ ᑕᖁᓕᑦᑐᖅ, ᐊᐃᑉᐸᕇᒃ ᓂᒋᐊᓂᒥᐅᒃ ᕿᑭᖅᑖᓘᑉ, ᐊᑕᐅᓯᐊᕋᑎᒃ ᐅᒥᐊᖅᑐᖃᑕᐅᖃᑦᑕᖅᓯᒪᔫᒃ ᖃᓪᓗᓈᓄᑦ ᐊᕐᕙᓂᐊᖅᑎᓄᑦ ᐅᒥᐊᖅᑐᖅᑎᓄᓪᓗ ᐊᕐᕕᑕᖅᑐᓄᑦ ᓄᓇᓕᓐᓄᑦ ᐊᑯᓂ ᐃᖏᕐᕋᔭᕆᐊᖃᖅᐸᑦᓱᑎᒃ 1850–ᖏᓐᓂ 1870 ᐊᕐᕌᒍᐃᑦ ᑎᑭᑦᓱᒋᑦ. ᑕᖁᓕᑦᑐᖅ ᐃᓅᓂᑯᒥᓂᖅ ᑕᒫᓂᒐᓚᒃ 1838 ᖃᖃᒻᒪᕆᓐᓂ, ᐅᐊᓐᓇᖓᓂ ᑎᓄᔾᔨᕕᐅᑉ. ᓄᑲᖅᓯᒥᓂᐅᓪᓗᓂ ᐅᐃᒥᓂᒃ, ᐃᐲᕐᕕᒻᒥᒃ. ᐊᑖᑕᓕᒥᓂᖅ ᐆᔭᖕᒥᒃ (Oo-yung), ᐊᓈᓇᖃᖅᓱᓂ ᓄᑭᐱᐅᕋᖕᒥᒃ (Noo-ker-pier-ung ) Newton –ᑲᖏᖅᓱᒥ ᑕᓯᐅᔭᕐᔪᐊᒥ.
ᐃᐲᕐᕕᐅᑉ ᑕᖁᓕᑦᑑᓪᓗ ᑎᑎᕋᐅᑕᐅᒋᐊᙵᖅᑐᒥᓃᑦ ᑲᑎᓯᒋᐅᕐᓂᒥᓂᖏᑕ ᒥᒃᓵᓄᑦ ᖃᓪᓗᓈᓂᒃ ᐊᕐᕕᓂᐊᖅᑎᓂᒃ ᐊᐅᔭᐅᑎᓪᓗᒍᒎᖅ 1851–ᒥ ᕿᒻᒥᖅᓲᒥ ᐸᓐᓂᖅᑑᑉ ᑲᖏᖅᓱᐊᓗᓂ. 1853–ᖑᑎᓪᓗᒍ, ᐃᙵᓚᓕᐊᖅᑐᒥᓃᒃ ᑎᖏᕐᕋᐅᑕᓕᒃᑯᑦ ᐊᑎᓕᒻᒧᑦ schooner Bee–ᒥᑲᑎᓯᔪᒥᓂᐅᓪᓗᑎᓪᓗ ᑯᐃ ᕕᒃᑐᐊᕆᔭᒥᒃ. ᐅᑎᕋᒥᒃ ᓄᓇᒥᓐᓄᑦ ᐊᕐᕌᒎᒃ ᒪᕐᕉᒃ ᑭᖑᓂᖓᒎᓕᖅᑐᖅ, ᑕᖁᓕᑦᑐᖅ ᑕᑯᓐᓇᖅᑕᐅᕙᓕᖅᑐᒥᓂᖅ ᑕᑯᒋᐅᖅᑕᐅᓪᓗᓂ ᑏᑐᖅᑎᓪᓗᒍ, ᓄᕕᖅᓴᑎᓪᓗᒍ, ᒥᖅᑯᓕᓐᓂᒃ ᒥᖅᓱᑎᓪᓗᒍ ᐊᓐᓄᕌᓂᒃ ᖃᓪᓗᓈᑎᑐᑦ ᓴᓇᒻᒪᓕᓐᓂᒃ, ᖃᓪᓗᓇᐅᔭᕈᓐᓇᓯᐊᖅᓱᓂᓗ. ᑐᓵᔨᐅᒐᔪᒃᐸᑦᑐᒥᓂᖅ ᐃᖅᑲᓇᐃᔮᕆᓪᓗᒍ.
1860–ᖑᑎᓪᓗᒍ, ᒥᐊᓕᒐᒥᐅᖅ ᐅᒥᐊᒃᑯᑦ ᓇᒧᙶᔭᖅᑎ ᓵᕈᔅ ᕗᕌᓐᓯᔅ ᕼᐋᓪ (Charles Francis Hall) ᑲᑎᓯᔪᒥᓂᖅ ᐃᐲᕐᕕᒻᒥᒃ Cyrus Field Bay–ᒥ ᐃᒪᖓᓂ. ᑕᐸᐃᕆᔭᓕᒥᓂᖅ ᔫᑉ ᐊᖑᓇᓱᐊᕈᓯᖓᓂᒃ ᖃᐅᔨᒪᓂᖓᓂᓪᓗ ᓇᐅᒃᑰᕆᐊᖃᕆᐊᖅ ᐃᖏᕐᕋᓪᓗᑎᒃ, ᐊᒻᒪᓗ ᑕᖁᓕᑦᑑᑉ ᐃᖅᑲᓲᓐᓂᖓᓂᒃ ᑐᙵᓇᒧᑦ, ᓱᔪᖓᐃᓐᓂᖓᓂᒃ, ᑲᙳᑦᑕᐅᓂᖓᓂᒃ, ᐊᒻᒪᓗ "ᐅᐃᒪᔮᕋᓂ ᐃᓱᒪᑐᔪᖅ." ᑖᒃᑯᐊ ᐊᐃᑉᐸᕇᒃ ᐃᑲᔪᖅᑎᒥᓂᐹᓗᖏᒃ ᐃᖏᕐᕋᓂᕐᒥᓂ ᐅᐸᑦᑲᑦᑕᖅᑕᒥᓄᑦ. ᕼᐋᓪ ᐅᑎᕋᒥ ᒥᐊᓕᒐᐃᑦ ᓄᓇᖓᓄᑦ 1862–ᖑᑎᓪᓗᒍ, ᑕᖁᓕᑦᑑᑉ ᐃᐲᕐᕕᐅᓪᓗ ᐃᓚᒋᔭᒥᓂᖓᓐ. ᐱᐊᕋᕐᒥᒃ ᐃᕐᓂᒥᓐᓂᒃ ᐃᓚᖃᖅᓱᑎᒃ, ᑕᕐᕋᓕᑭᑖᒥᒃ. ᑖᒃᑯᐊ ᐃᓚᒌᑦ ᐅᐸᒃᓯᒪᐃᓐᓇᖃᑦᑕᖅᑐᒥᓃᑦ ᕼᐋᓪ ᑮᓇᐅᔭᓂᒃ ᑲᑎᖅᓱᐃᓂᐊᖅᓱᓂ ᐅᖃᓕᒪᔭᖅᑐᕐᕕᒋᕙᑦᑕᖏᓐᓂ, ᑭᓯᐊᓂ ᑖᒃᑯᐊ ᐱᖓᓱᑦ ᐃᓄᐃᑦ ᐋᓐᓂᐊᓕᖅᑐᒥᓃᑦ. ᑕᕐᕋᓕᑭᑖᖅ ᑐᖁᔪᒥᓂᖅ ᐳᕙᖏᑦ ᐃᒻᒪᑦᑐᒥᓂᐅᒻᒪᑕ ᕕᐅᓪᓗᐊᓕᐅᑎᓪᓗᒍ 1863–ᒥ ᓂᐅ ᔪᐊᒃ ᓯᑎᒥ (New York City). ᑕᖁᓕᑦᑐᖅ ᑭᑦᓵᓕᒥᓂᖅ ᐃᕐᓂᕐᒥᓂᒃ ᐊᕐᕌᒍᕋᓴᓐᓂᒃ ᑭᖑᓂᖓᒍᑦ ᑎᑎᖅᑲᒥᒍᑦ ᓇᓗᓇᐃᖅᐸᑦᓱᒍ ᑭᔅᓵᓐᓂᓂ ᒥᐊᓕᒐᒥᐅᒧᑦ ᐱᖃᑎᒥᓄᑦ ᓯᐊᕋ ᐸᑎᓐᑕᖕᒧᑦ (Sarah Buddington).
ᑕᑯᒍᒃ : ᕼᐋᓪ, ᐅᑭᐅᖅᑕᖅᑐᒥ ᖃᐅᔨᓴᕐᓂᒥᓃᑦ, ᒪᑉᐱᖓᖏᓐᓂ, 158-159.
1864–ᖑᑎᓪᓗᒍ, ᐊᐃᑉᐸᕇᒃ ᐅᑎᖅᑐᒥᓃᒃ ᐅᑭᐅᖅᑕᖅᑐᒧᑦ ᕼᐋᓪᒥᒃ ᐅᑎᖃᑎᖃᖅᓱᑎᒃ, ᓇᐅᔮᖅᐸᓯᒻᒧᑦ ᐅᖅᓱᕆᐊᖅᐸᓯᒻᒧᑦ ᐃᑎᓪᓕᖅᐸᓯᓐᓄᓪᓗ. ᐃᖏᕐᕋᔪᒥᓃᑦ ᐊᕐᕌᒍᓂᒃ ᑕᓪᓕᒪᓂᒃ. ᐃᐲᕐᕕᑯᒃ ᑕᖁᓕᑦᑐᒃᑯᒃ ᕿᑐᕐᖓᐃᒃᑲᓂᕐᓂᕐᒥᔫᒃ, ᐃᓅᓱᓕᖅᑐᒥᓪᓗ ᐊᕐᓇᕐᒥᒃ ᑎᒍᐊᖅᑐᒥᓂᐅᓪᓗᑎᒃ ᐸᓂᒥᒃ ᑐᖅᓱᕋᖅᓱᒍ, ᐸᓂᓂ. 1869–ᖑᑎᓪᓗᒍ, ᐅᑎᓕᕐᓂᕐᒥᔪᑦ ᐸᓂᒻᒥᓐᓂᒃ ᐃᓚᖃᖅᓱᑎᒃ ᒥᐊᓕᒐᐃ ᓄᓇᖓᓄᑦ, ᕼᐋᑉ ᐃᖅᑲᓇᐃᔭᖅᑎᑖᕆᒃᑲᓐᓂᑦᓴᐅᑎᒋᔭᒥᓂᖏᒃ ᐃᓚᖓᓐᓂ ᐃᖏᕐᕋᓂᖓᑕ ᓄᓇᕐᔪᐊᑉ ᑲᔾᔨᐊᓄᑦ.
ᐃᖏᕐᕋᓂᕐᒥᓐᓂ ᑎᑭᐅᑎᓐᓂᐅᔭᕐᓂᖏᑦᑐᓪᓘᓐᓃᑦ ᓄᓇᕐᔪᐊᑉ ᑲᔾᔨᐊᓄᑦ. ᕼᐋᓪ ᑐᖁᔪᒥᓂᐅᓪᓗᓂ, ᐅᒥᐊᖓᓪᓗ ᐃᒻᒪᑦᑕᓕᖅᑐᒥᓂᐅᓪᓗᓂ, ᖁᓕᓪᓗ ᖁᓕᐅᙱᒐᖅᑐᓪᓗ ᐃᑭᒪᖃᑕᐅᔪᑦ ᐱᖃᑕᐅᓪᓗᓂ – ᐃᐲᕐᕕᒃ, ᑕᖁᓕᑦᑐᖅ, ᐸᓂᓪᓗ – ᐊᔪᖅᓯᐅᖅᑲᓕᕐᓂᖅᓱᑎᒃ ᑐᕙᕐᒥ ᑕᖅᑮᑦ ᐱᖓᓲᔪᖅᑐᑦ ᐅᖓᑖᓄᑦ. ᐅᓯᓕᐅᔾᔭᐅᓕᖅᑐᒥᓃᑦ ᓇᑦᓯᓂᐊᖅᑎᓄᑦ ᓯᔾᔭᖓᓂ ᓛᐸᑐᐊᑉ, ᑕᒫᓂᒐᓚᒃ 3,000 ᑭᓛᒥᑐᓂᒃ ᐅᖓᓯᓐᓂᓕᒻᒥᒃ ᐃᖏᕐᕋᓯᕕᒥᓂᖓᑦᑕ. ᐃᓘᓐᓇᑎᒃ ᐊᓐᓇᑦᑐᒥᓃᑦ, ᖁᔭᓇᓪᓚᕆᑦᑐᖅ ᖃᐅᔨᒪᓂᖏᓐᓄᑦ ᐊᖑᓇᓱᐊᕐᓂᕐᒥᒃ ᐃᐲᕐᕕᐅᑉ ᕼᐊᓐᔅ ᕼᐃᐊᑐᕆᐅᓪᓗ (Hans Hendrk), ᐃᓄᒃᑕᐅᖅ ᓯᓈᓃᖃᑎᒥᓂᖅ. ᐃᓄᐃᑦ ᖁᔭᓈᕈᓐᓇᖅᑐᒥᓃᑦ ᖃᓪᓗᓈᓂᒃ ᐅᒥᐊᖅᑐᖅᓯᒪᖃᑕᐅᔪᓂᒃ, ᐱᑦᓯᐊᖅᑎᒋᖃᑦᑕᖅᓯᒪᖏᑕᒥᓐᓂᒃ ᑕᐃᒪᖓᓕᒫᒐᓚᒃ ᐊᔾᔨᒌᑎᑦᓯᒐᑎᒃ. ᐃᐲᕐᕕᒃ ᐅᖃᖅᑐᒥᓂᖅ ᑕᒫᓂᑐᐃᓐᓈᕐᓂᕆᐊᖅ ᖃᓪᓗᓈᓂᒃ ᐅᒥᐊᓕᑦᑕᓂᒃ ᑐᖁᑐᐃᓐᓇᖁᔨᖏᒧᑦ, ᕼᐊᓪᒧᓪᓗ ᐊᖏᖅᓯᒪᓐᓂᖅᓱᓂ ᐊᖑᓇᓱᐊᕈᔾᔨᖃᑦᑖᓚᕆᐊᖅ ᐅᒥᐊᖅᑐᖅᓯᒪᔪᓂᒃ ᐃᖏᕐᕋᓪᓗᑎᒃ ᐅᖓᓯᑦᑐᒧᑦ.
1873–ᖑᑎᓪᓗᒍ, ᑕᖁᓕᑦᑐᖅ ᐊᒻᒪᓗ ᐃᐲᕐᕕᒃ ᐃᓂᓪᓚᑲᓐᓂᕐᓂᕐᒥᔫᒃ ᒥᐊᓕᒐᐃᑦ ᓄᓇᖓᓐᓂ, ᐊᔪᕐᓇᑐᖅᓯᐅᓯᑦᓱᑎᒃ ᐃᓕᓐᓇᓱᐊᕆᐊᖅ ᖃᓪᓗᓈᑦ ᐱᐅᓯᖏᓐᓂᒃ ᐃᓚᐅᑎᕐᓂᒥᓪᓗ ᓄᑖᒧᑦ ᓄᓇᓕᒻᒧᑦ. ᑕᖁᓕᑦᑐᖅ ᑐᒃᓯᐊᕆᐊᖅᐸᒃᓱᓂ, ᐅᖃᓕᒫᕈᓐᓇᖅᓯᔪᒥᓂᖅ ᐅᖃᓕᒫᒐᕐᓂᒃ, ᑐᒃᓯᐊᕆᐊᖅᓯᒪᕙᒃᓱᓂ, ᑲᔾᔮᕆᔭᖃᕐᓂᖅᓱᓂᓗ ᓂᕆᒋᐊᖅ ᓂᐊᖂᔭᒥᒃ ᐊᐅᐸᕈᔪᒃᑐᒥᒃ ᑕᐃᔭᖅ ᔨᔾᔪᐳᕆᐊᑦ ᖃᓪᓗᓈᑎᑐᑦ (gingerbread). ᑖᒃᑯᐊ ᐊᐃᑉᐸᕇᒃ ᐸᓂᒻᒥᓐᓂᒃ ᑕᑯᓐᓇᕆᐊᖅᑎᒃᓯᔪᒥᓃᒃ ᐱᙳᐊᖅᑐᓄᑦ ᖃᓄᑐᐃᓐᓇᖅ ᐱᙳᐊᕈᓯᓕᓐᓄᑦ ᐆᒪᔪᓂᒃ ᐊᑐᖅᓱᑎᒃ ᑕᑯᒃᓴᐅᑎᒃᓯᕙᑦᑐᓄᑦ, ᑎᑎᕋᖅᑕᐅᑎᓪᓗᓂᐅᓪᓗ ᐃᓕᓐᓂᐊᕆᐊᖃᑦᑕᓂᐊᕐᒪᓐ ᑕᒫᓂ ᓇᔪᖅᑕᒥᓐᓂ ᐅᐸᑦᓴᐃᓐᓇᖅᑎᖃᑦᑕᖅᓱᓂᐅᓪᓗ ᖃᐅᑕᒫᑦ ᐃᓕᓐᓂᕕᒻᒧᑦ. ᐃᐲᕐᕕᒃ ᓯᐊᕐᕆᔮᕈᓐᓇᖅᓯᔪᒥᓂᖅ ᓯᑯᐊᒥ. ᑕᖁᓕᑦᑐᖅ ᒥᖅᓲᑎᑖᕐᓂᖅᓱᓂ, ᐊᓐᓄᕋᕐᔨᐅᕈᑎᒋᖃᑦᑕᓕᖅᓱᒍ ᓂᐅᕐᕈᑎᒋᕙᒃᓱᒋᑦ ᒥᖅᓱᒐᓂ. ᐃᐲᕐᕕᒃ ᑲᒪᒋᔭᕆᐊᓕᓐᓂᒃ ᑲᒪᕙᒃᓱᓂ, ᕿᔪᓐᓂᓪᓗ ᓴᓇᔭᕆᐊᓕᓐᓂᒃ ᓴᓇᕙᒃᓱᓂ, ᐃᖅᑲᓇᐃᔭᖃᑦᑕᖅᓱᓂᓗ ᐱᕈᖅᓰᕕᓐᓂ ᐆᒪᔪᓂᒃ ᓄᓇᕋᓂᓪᓗ ᑲᒪᔨᒋᔭᐅᓪᓗᓂ.
ᑕᖁᓕᑦᑐᒃᑯᒃ ᐃᐲᕐᕕᒃᑯᒃ ᖁᔭᓈᕐᓂᖏᑦᑑᒃ ᐃᓕᖅᑯᓯᒥᓐᓂᒃ. ᐊᑕᐅᓯᖅ ᒥᐊᓕᒐᕐᒥᐅᖅ ᓴᓂᓪᓕᕆᕙᑦᑕᒥᓂᖓᑦ ᐃᖅᑲᐅᒪᔪᖅ ᑕᖁᓕᑦᑐᖅ ᕿᓯᓐᓂᒃ ᐊᓐᓄᕋᕐᔨᐅᖃᑦᑕᕐᓂᕆᐊᖓ ᖃᓪᓗᓈᓂᒃ ᐱᖃᓐᓇᕆᔭᒥ ᕿᑐᕐᖓᖏᓐᓂᒃ. ᐃᐲᕐᕕᒃ ᓴᓇᙳᐊᕈᔾᔨᕙᑦᑐᒥᓂᖅ ᐱᙳᐊᕆᔭᐅᓂᐊᖅᑐᓂᒃ, ᓴᓇᖃᓯᐅᑎᕙᒃᓱᓂ ᒥᑭᔫᑎᓂᒃ ᐆᒪᔪᙳᐊᓂᒃ ᑑᒑᔭᐅᓪᓗᑎᒃ. ᐃᐲᕐᕕᒃ ᐅᓂᒃᑳᖃᓚᐅᓪᓚᐸᑦᑐᒥᓂᖅ ᐅᑭᐅᖅᑕᖅᑐᒥ ᐃᓪᓗᒋᔭᐅᔪᑦ ᒥᒃᓵᓄᑦ, ᐅᑭᐅᑉ ᐃᓚᖓᓐᓂ ᐃᓪᓗᓕᓐᓂᕐᒥᔪᖅ ᓯᓚᑖᓐᓂ ᐊᖏᕐᕋᒥ ᒥᐊᓕᒐᕐᓂ, ᑕᓯᐊᕈᔭᒥᒃ ᓂᓚᒻᒥᒃ ᐃᒐᓚᔾᔨᖅᑕᒥᓂᕆᓪᓗᓂᐅᒃ. ᑖᒃᑯᐊ ᐃᓚᒌᑦ ᓯᓂᕝᕕᒥᓂᖓ ᐅᓐᓄᐊᖓᓂ. ᐃᐲᕐᕕᒃ ᕿᒃᓵᕈᑎᖃᖅᐸᑦᑐᒥᓂᖅ ᐃᓕᖅᑯᓯᒥᓂᒃ ᐊᑐᕈᓐᓇᙱᒋᐊᖅ. ᑎᑎᕋᖅᑐᒥᓂᖅ ᐅᑎᕈᒪᓂᕋᖅᓱᓂ ᐅᑭᐅᖅᑕᖅᑐᒧᑦ, ᐱᔾᔪᑎᒋᓪᓗᒍ ᒥᐊᓕᒐᐃᑦ ᓄᓇᖓᓂ "ᓱᔭᒃᓴᖅᑕᖃᙱᒻᒪᑦ." "ᓱᓕᕆᒍᒪᔪᖓ ᕿᑲᑐᐃᓐᓇᖏᓪᓗᖓ," ᑎᑎᕋᖅᑐᒥᓂᖅ. "[ᓄᓇᓐᓂ] ᐊᖑᓇᓱᐊᖏᓐᓇᖅᐸᔪᔪᖓ.. ᐃᕿᐊᓱᑐᐃᓐᓇᕆᐊᖅ ᓈᒻᒪᒋᖏᓇᒃᑯ.”
ᑕᑯᒍᒃ : ᒨ ᐃᐊᑎᑦᐱᖕ ᑐᕌᖅᑎᓪᓗᓂᐅᒃ ᕼᐃᐊᓐᓄᓕ ᐳᕆᕘᐊᒧᑦ ᐅᖃᓕᒫᒐᖅ ᑕᐃᔭᖅ, Esq, 20 ᔫᓂ 1870. ᓵDᔅ ᕗᕌᓐᓯ ᕼᐋᓪ ᒥᒃᓵᓄᑦ ᓄᐊᑕᐅᓯᒪᔪᑦ, ᑕᑯᑦᓱᒐᖃᕕᖓᓂ, Smithsonian National Museum of American History Archives.
1875–ᖑᑎᓪᓗᒍ, ᐸᓂᒃ ᐋᓐᓂᐊᓕᖅᑦᒥᓂᖅ ᑐᖁᓪᓗᓂᓗ ᒥᐊᓕᒐᐃᑦ ᓄᓇᖓᓂ. ᐊᕐᕌᒍᕐᒪᓐ, ᐃᐲᕐᕕᒃ ᖃᓪᓗᓈᓄᑦ ᐃᓚᒋᔭᒥᓂᖅ ᐃᖏᕐᕋᔪᓄᑦ ᑕᒪᐅᖓ ᐅᑭᐅᖅᑕᖅᑐᒨᕋᓱᐊᖅᑐᓄᑦ. ᑕᖁᓕᑦᑐᖅ ᑐᖁᔪᒥᓂᖅ ᐳᕙᓪᓗᓇᕐᒧᑦ ᐅᐃᖓ ᐊᐅᓪᓚᖅᓯᒪᑎᓪᓗᒍ. ᐃᐲᕐᕕᒃ ᐅᑎᕋᒥ ᓄᓕᐊᓂᓗ ᑐᖁᖓᓕᖅᑐᖅ, ᐊᐅᓪᓚᖅᑐᒥᓂᖅ ᒥᐊᓕᒐᕐᓂᒃ ᐅᑎᕐᕕᒋᒃᑲᓐᓂᕈᓐᓃᖅᑕᒥᓂᕆᓪᓗᓂᐅᓪᓗ. ᐊᖏᕐᕋᖅᑑᔮᕈᑎᒋᕙᓐᓂᕋᒥᐅᒃ ᐃᓚᓂ ᒥᐊᓕᒐᕐᓃᑎᓪᓗᒋᑦ. ᓄᓕᐊᓂᒃᑲᓂᖅᑐᒥᓂᖅ, ᑭᓯᐊᓂ ᑐᖁᔪᒥᓂᖅ 1881–ᖑᓕᖅᑎᓪᓗᒍ ᑲᖏᖅᓱᐊᓗᖕᒥ.