ᒪᑐᔾᔪᑎᖓ

ᐊᐱᖅᓱᖅᑕᐅᑦᓱᓂ ᐅᖃᐅᓯᒥᓂᖏᓐᐋᓐ ᐃᖅᑲᒋᓇᖅᑐᖅ ᐋᓐ ᒥᑭᔾᔪᒃ ᕼᐊᓐᓴᓐ

ᑐᓴᐅᒪᔭᒃᑲᓕ ᑕᐃᒃᑯᐊ ᑭᒻᒥᕈᒻᒥᐅᖃᑦᑕᓚᐅᕋᒪ. ᑕᒡᒐ ᑭᒻᒥᕈᑎᐅᑉ ᓯᓚᑖᓂ ᐃᓅᑦᑕᕐᓂᕋᒪ ᐊᒻᒪᓗ ᐅᓂᒃᑳᖅᑲᐅᒋᓪᓗᖓ ᑕᐃᒃᑯᐊ ᓯᕗᓕᒃᑲ ᐃᑲᔪᖃᖃᑦᑕᒥᓂᐅᓂᕋᖅᑐᒋᑦ ᐊᕐᕕᓐᓂᐊᖅᑎᓂᒃ, ᑕᐃᒪᓐᓇ ᑐᓴᐅᒪᔭᕋ.

ᑕᐃᓐᓇᑦᑕᐅᖅ ᑭᒻᒥᕈᑦ ᓯᕗᓪᓕᖅᐹᖑᓂᖑᒥᓂᐅᓐᓂᕐᖓᑦ ᑕᐃᒃᑯᐊ ᐊᕐᕕᓐᓂᐊᖅᑐᐃᑦ ᑎᑭᖃᑦᑕᓕᖅᑎᓪᓗᒋᑦ. ᐃᒫᒃ ᑐᓴᐅᒪᓇᖅᑐᖅ ᑕᒪᒃᑯᐊ ᐃᓄᐃᑦ ᐃᓄᕋᓴᐃᑦ ᐃᑲᔪᖅᑎᒋᔭᐅᔪᒪᖃᑦᑕᕐᓂᕐᖓᑕ. ᐅᐱᓐᓇᕋᓂ ᖃᐅᔨᒪᓂᖅᓴᐅᒻᒪᑕ ᑕᒪᒃᑯᓂᖓ ᑎᑭᑐᐃᓐᓇᖃᑦᑕᖅᑐᓂᒃ. ᑕᒪᒃᑯᐊᓕ ᐃᓄᐃᑦ ᑕᒫᓂ ᓄᓇᒥᐅᖑᑦᑕᕋᒥᒃ ᖃᐅᔨᒪᑦᑎᐊᕋᒥᒃ ᓄᓇᓕᒫᓂᒃ, ᕿᑭᖅᑕᓂᒃ, ᑰᖕᓂᒃ, ᑕᓯᕐᓂᒃ ᓱᓇᓕᒫᑦᑎᐊᓂᒃ, ᐅᐱᓐᓇᕋᓂ ᐃᑲᔪᑦᑎᒋᔭᐅᖃᑦᑕᕐᓂᕐᖓᑕ ᐊᒻᒪᓗ ᐃᓕᓐᓂᐊᖅᑎᑦᑎᑦᑎᐊᖅᓱᑎᒃ. ᑕᐃᒃᑯᐊ ᐃᓄᐃᑦ ᐃᑲᔪᖃᑦᑕᖅᑕᒥᓂᕐᓄᑦ ᑕᒪᒃᑯᓂᖓ ᐊᕐᕕᓐᓂᐊᑦᑏ ᐃᓅᖃᑦᑕᖅᑐᒥᓃᑦ. ᐃᒫᒃ ᔭᒐᓚᖓᓂᖅᑎᓪᓗᒋᓪᓘᓐᓃᑦ ᑳᓕᖅᑎᓪᓗᒋᓪᓘᓐᓃᑦ, ᕿᐅᒐᓚᖓᓕᖅᑎᓪᓗᒋᓪᓘᓐᓃᑦ ᐃᑲᔪᖅᑕᐅᖃᑦᑕᖅᑐᒥᓂᐅᒻᒪᑕ.

ᑕᐃᒃᑯᐊ ᐊᖑᑏᑦ ᐃᑲᔪᖅᑎᑑᙱᑦᑐᙴᖅ ᑕᐃᒪ ᑕᒪᒃᑯᐊ ᐊᕐᓇᓂᒃ ᕿᒻᒥᓂᓪᓗ ᐊᑦᓱᐊᓗᒃ ᐃᑲᔪᖃᑦᑕᖅᑐᒥᓂᐅᒻᒥᔪᑦ. ᑕᐃᒃᑯᐊ ᐊᕐᓇᐃᑦ ᒪᑯᓂᖓ ᒥᖅᓱᖅᑎᐅᒻᒪᑕ ᑲᒥᖕᓂᒃ, ᐊᓐᓄᕌᓂᒃ ᒥᖅᓱᖅᑎᐅᕙᒃᑐᑎᒃ ᓇᒃᓴᖅᑕᐅᖃᑦᑕᖅᑐᒥᓂᐅᒻᒪᑕ, ᑕᐃᒫᒃ ᑕᒪᓐᓇ ᑐᓴᐅᒪᓇᕐᒥᔪᖅ.

ᑕᐃᒪᒎᖅ ᓂᕆᐅᒋᔭᐅᖃᑦᑕᓕᒐᐃᒻᒪᑕ ᑕᐃᒃᑯᐊ ᐊᕐᕕᓐᓂᐊᖅᑎᐊᓗᐃᑦ ᑎᑭᓚᐅᖃᑦᑕᕆᐊᕐᓂᐊᕐᒥᒻᒪᑕ ᓯᓚ ᐃᒪᐃᓕᕋᐃᒻᒪᑦ ᐊᐅᔭᐅᓕᕋᐃᒻᒪᑦ. ᑕᐃᒪ ᐃᓄᕋᓴᐃᑦ ᓂᕆᐅᑦᑕᓕᕋᐃᒐᒥᒃ ᐊᕐᕕᓐᓂᐊᖅᑎᐊᓗᓐᓂᒃ ᑎᑭᒍᒫᕐᓂᐊᖃᑦᑕᖅᑐᒥᓂᐅᒻᒪᑕ ᐃᒪᐃᑦᑑᓕᖅᑲᑦ ᓯᓚ ᐊᐅᔭᐅᓕᖅᐸᑦ.

ᐊᓱᐃᓪᓛᒎᖅ ᓂᕆᐅᓐᓇᖅᓯᑦᑕᕋᐃᒻᒪᑕ ᑕᐃᒃᑯᐊ ᐅᒥᐊᕐᔪᐊᑦ. ᐃᓄᐃᑦ ᑲᑎᖃᑦᑕᖅᑐᒥᓂᐅᒻᒪᑕ ᓄᓇᒥ ᐊᑕᐅᓯᕐᒥ, ᑕᐃᑲᓂ ᑲᑎᕝᕕᒋᓛᕐᓂᐊᖅᑕᖓᓐᓂ ᑲᑎᓲᖑᓐᓂᕐᖓᑕ. ᐅᑕᖅᑭᐅᑎᓪᓗᒋᑦ ᑕᒪᒃᑯᓂᖓ ᐅᒥᐊᕐᔪᐊᓂᒃ ᓂᕆᐅᒋᔭᐅᓕᖅᑐᓂᒃ. ᐃᒫᒃ ᑕᐃᑦᓱᒪᓂᐊᓘᒻᒪᑦ ᖃᖅᑲᓕᐊᖅᑎᖃᖃᑦᑕᖅᑐᑎᓪᓗᒍ ᖃᖅᑲᓕᐊᑦᑎᓂᒃ ᐃᓄᒻᒥᒃ. ᑕᐃᒫᖅᑲᐃ ᓇᓪᓕᑭᑖᖅᑐᑎᒃ ᖃᖅᑲᓕᐊᖃᑦᑕᖅᑐᒥᓃᑦ ᐅᒥᐊᕐᔪᐊᒥᑦ ᑕᑯᖅᑳᕈᒪᒧᑦ. ᑕᐃᒪ ᐊᓱᐃᓪᓛᒃ ᑐᓴᐅᒪᓇᕐᒥᔪᖅ ᐃᓅᖃᑎᑦᑎᓐᓂ.

ᑕᐃᒃᑯᐊ ᓯᕗᓕᒋᐊᒃᑲᓐᓂᒥᓂᕗᑦ ᑕᐃᒪᒎᖅ ᓇᐃᒪᓲᒥᓂᒻᒪᕆᐅᓘᓐᓂᕐᖓᑕ ᐅᒥᐊᕐᔪᐊᓱᓐᓂᒥᒃ ᐃᓯᐊᖓᓂᒃ, ᐅᒥᐊᕐᔪᐊᖅ ᑖᕙᓂᐊᓘᑎᓪᓗᒍ ᓱᓕ. ᖃᐅᑉᐸᓘᓐᓃᑦ ᑎᑭᓛᕐᓂᐊᖅᑎᓪᓗᒍ ᓱᓕ ᓇᐃᒪᖃᑦᑕᓕᕐᖓᑕ ᐃᓯᐊᕐᓂᕐᒥᒃ. ᐅᒥᐊᕐᔪᐊᖅ ᖃᐅᑉᐸᑦ ᖃᐅᑉᐸᓵᕐᓘᓐᓃᑦ ᑎᑭᑦᑕᓛᓕᖅᑯᖅ, ᑕᐃᒫᒃ ᑕᐃᒪᐃᖃᑦᑕᖅᑐᒥᓃᑦ ᓯᕗᓕᕗᑦ. ᑕᒪᓐᓇ ᑐᓴᐅᒪᓇᖃᑦᑕᕐᒪᑦ.

ᑕᐃᒫᒃ ᑐᓴᖅᓴᐅᓐᓇᖅᑐᕕᖔᓘᖃᑦᑕᓚᐅᖅᓯᒪᒻᒪᑦ ᐅᕕᒃᑲᐅᒃᑲᓐᓂᖅᑐᓂ ᐃᓅᖃᑎᑦᑎᓐᓂᒃ, ᐅᐱᓐᓇᕋᓂ ᓯᕗᓕᓕᐊᓘᒐᑦᑕ. ᑕᐃᓐᓇ ᓯᕗᓕᕗᑦ, ᐊᓂ ᑭᒪᓗᒃ ᑕᐃᑦᑕᖅᑲᐅᒐᒃᑯ ᐊᒻᒪ ᔮᓂ ᐴ, ᑲᓪᓛᕐᔪᒡᓗ. ᑲᓪᓛᕐᔪᒎᖅ ᐊᑖᑕᖃᖅᑐᒥᓂᐅᒻᒪᑦ ᐊᕐᕕᓐᓂᐊᖅᑎᒥᒃ, ᐊᓪᓛᑦ ᐊᖓᔪᖅᑳᕆᔭᐅᔪᒥᒃ. ᐅᒥᐊᓕᖅᑕᓂᒃ ᑕᐃᖃᑦᑕᓚᐅᖅᓯᒪᔭᕗᑦ.

ᑕᐃᓐᓇ ᐊᑖᑕᒥᓂᖓ ᓇᓪᓂᐊᖑᓐᓂᕐᒪᖔᑦ ᓯᑳᑎᐅᓐᓂᕐᒪᖔᓪᓘᓐᓃᑦ ᐊᐃᕆᔅᒥᓂᐅᒪᖔᓪᓘᓐᓃᑦ ᖃᐅᔨᒪᙱᑐᐃᓐᓇᖅᑐᙴᖅ. ᐅᕙᖓ ᓇᒻᒥᓂᖅ ᑐᓴᐅᒪᑦᑎᐊᖅᑐᖓᓕ ᖃᓪᓗᓈᒥᒃ ᓯᕗᓕᖃᖅᑐᑦ. ᐊᒻᒪᓗ ᑕᐃᒃᑯᐊ ᐊᓯᑯᓗᕗᑦ ᐃᓚᕗᑦ ᓯᕗᓕᖃᖅᑐᑎᑦᑕᐅᖅ ᐊᕐᕕᓂᐊᖅᑎᓂᒃ, ᑕᐃᑲᓂᓕ ᑭᒻᒥᕈᒻ ᐃᓛᒃ. ᑕᐃᒪᓐᓇ ᖃᐅᔨᒪᓇᖅᑐᖅ.

ᐊᑦᓱᐊᓗᒃ ᑐᓴᕆᐊᕈᒥᓇᖅᑕᖅᑐᑦ ᑕᒪᒃᑯᓂᖓ ᐅᓪᓗᒥᒧᑦ ᓱᓕ ᖃᓄᐃᓕᐅᖃᑦᑕᖅᑐᒥᓂᐅᒻᒪᖔᑕ ᐊᕐᕕᓐᓂᐊᖅᑏᑦ ᑕᐃᑲᓂ ᑭᒻᒥᕈᒻᒥ ᐃᓛᒃ. ᑕᐃᓐᓇ ᐅᓂᒃᑳᖃᑦᑕᓚᐅᖅᓯᒪᒻᒥᒻᒪᑦ ᐃᓚᒋᓚᐅᖅᓯᒪᔭᕗᑦ ᑎᒥᓛᖅ, ᑎᒥᓛᖑᓚᐅᖅᓯᒪᔪᖅ. ᐃᔪᕐᓇᕋᓗᒃᑐᓂᓪᓗ ᐅᓂᒃᑳᓯᕙᑦᑐᓂ − ᖃᑦᑕᓚᐅᖅᓯᒪᒻᒪᑦ ᑭᒻᒥᕈᒻᒥ ᑐᓴᐅᒪᔭᖏᓐᓂᒃ.

ᐃᒫᒃ, ᑕᐃᒃᑯᐊᒎᖅ ᐱᑖᕈᒪᒧᑦ ᒪᑯᓂᖓ ᖃᓪᓗᓈᖅᑕᒐᓚᓐᓂᒃ ᐃᕐᖑᓯᕐᓂᒃ, ᑏᓕᐅᕈᑎᓂᒃ, ᓴᒃᑯᓂᒃ ᓴᕕᓐᓂᒃ, ᕿᐱᓐᓂᒃ. ᖃᓪᓗᓈᖅᑕᕋᓚᓐᓂᒃ ᐱᒍᒪᒧᑦ ᓄᓕᐊᓂ ᑕᐅᖅᓯᐅᑎᖃᖃᑦᑕᒥᓂᖏᑦ ᑕᐃᒃᑯᓄᖓ ᑎᑭᓯᒪᔪᓄᑦ ᐊᒻᒪᓗ ᐊᖓᔪᖅᑳᐅᑎᓄᓪᓗᖃᐃ ᐅᒥᐊᓕᒃᑕᓕᖕᓄᑦ ᐅᕝᕙᓘᓐᓃᑦ ᖃᓪᓗᓈᑐᐃᓐᓇᕐᒧᑦ. ᑕᐃᒃᑯᐊᒎᖅ ᐊᕐᓇᖅᓯᐅᒍᒪᓕᕋᐃᒐᒥᒃ ᐊᕐᕕᓐᓂᐊᖅᑏᑦ ᐅᒥᐊᕐᔪᐊᓂᓪᓘᓐᓃᑦ ᑎᑭᓯᒪᔪᑦ, ᓄᓕᐊᖏᓐᓂᒃ ᐊᑐᑲᐃᓐᓇᕈᒪᙱᒃᑲᓗᐊᕐᒪᖔᑕ ᐊᐱᕆᖃᑦᑕᕐᓂᕐᒥᒻᒪᑕ, ᑎᒥᓛᖅ ᐅᓂᒃᑳᖃᑦᑕᓚᐅᖅᓯᒪᔪᖅ. ᐊᓱᐃᓛᒍᖅ ᑕᐃᒃᑯᐊ ᓄᓕᐊᓖᑦ ᐊᖏᑲᐃᓐᓇᖃᑦᑕᓚᐅᖅᓯᒪᔪᑦ ᐱᑖᕌᕐᔪᒍᒪᒧᑦ ᖃᓪᓗᓈᖅᑕᕋᓚᓐᓂᒃ, ᑏᒥᓪᓘᓐᓃᑦ, ᑐᐸᑭᒥᓪᓘᓐᓃᑦ, ᕿᐱᓐᓂᓘᓐᓃᑦ, ᑕᒪᒃᑯᓂᖓ ᖃᓪᓗᓈᖅᑕᕋᓚᓐᓂᒃ. ᐅᓂᒃᑳᓕᕋᐃᒻᒪᑦ ᑕᒪᑐᒥᖓ ᐃᔪᕐᓇᖃᑦᑕᓚᐅᖅᓯᒪᔪᖅ.

ᒪᑐᔾᔪᑎᖓ

ᕗᕆᐊᑦ ᑳᓚᐳᕆᐊᑦᑕ

ᒪᑐᐃᖅᑕᐅᑎᓪᓗᒍ ᕼᐊᑦᓴᓐ ᐲ ᑲᖏᖅᖣᔭᖓ ᐊᕐᕙᒐᓱᖕᓂᕐᒧᑦ 1860ᒥ ᐱᕕᒡᔪᐊᖑᓚᐅᖅᐳᖅ. ᒪᕐᕉᒃ ᓅ ᐱᑦᕗᑦ ᐅᒥᐊᕐᔪᐊᒃ ᐊᑐᖅᑕᐅᓪᓗᑎᒃ, ᑲᐱᑕᐃᖏᒃ ᓅ ᓚᓐᑕᓐᒥᐅᑕᐅᓚᐅᕐᒪᑎᒃ ᐊᕐᕙᖕᓂᐊᖅᑏᒃ. ᐱᖃᑖ

ᑯᕆᔅᑎᕗ ᓵᐳᓪᒥᒃ ᐊᑎᖃᓚᐅᖅᐳᖅ, ᒪᒃᓕᓚᓐᒦᓐᓂᑯ (ᐅᓂᒃᑲᐅᓯᐅᓯᒪᖃᓯᐅᑎᔪᖅ ᒪᒃᓕᓚᓐᓕᕆᔪᓂ). ᑕᐃᒪᙵᓂᑦ ᒪᑐᐃᕐᒪᑦ 1860ᒥᑦ ᐃᓱᓕᓐᓂᖓ ᑎᑭᖢᒍ 1890ᖏᓐᓄᑦ ᐊᕐᕙᒐᓱᖕᓂᖅ ᐅᑭᐅᖅᑕᖅᑐᒥ

ᐊᕝᕙᖏᑕ ᐅᖓᑖᓄᑦ ᑮᓇᐅᔭᑎᒍ ᐱᕈᕆᐊᕈᑕᐅᓂᑰᕗᖅ ᐅᐸᒃᑕᐅᕙᒃᑐᓪᓗ ᐱᖃᓯᐅᑎᓪᓗᒋᑦ.

ᓄᓇᓕᖏᓐᓄᑦ ᐊᕐᕙᒐᓱᖕᓂᓕᕆᓂᖅ ᒪᑭᒪᓕᐅᑕᐅᓂᑰᕗᖅ.

ᑲᐱᑕᐃᓐ ᔪᐊᔾ ᑰᒧ ᐃᓅᓕᕐᓂᑰᕗᖅ 1858ᒥ. ᑯᐃᐱᒃᒥ ᓄᓇᖃᕐᓂᑯ. ᓱᕈᓯᐅᓂᖓ ᓇᓗᓇᒐᓚᒃᑑᒐᓗᐊᖅ.

ᐊᑖᑕᖓ ᐅᒥᐊᖅᑐᕐᓯᒪᓪᓗᓂ ᐅᑎᙱᓴᐃᓐᓇᖅᑐᕕᓂᖅ ᐃᓅᕋᑖᕕᓂᐅᑎᓪᓗᒍ ᔪᐊᔾ. ᐊᓈᓇᖓ ᐃᖕᓚᓐᒥᐅᕕᓂᖅ. ᒥᐊᓕᒐᕐᓄᐊᕐᓂᖅᒪᓪᓕ ᖃᓅᒐᓗᐊᑭᐊᖅ. ᐊᒃᓱᕈᕐᓇᖅᑐᖅᓯᐅᖅᐸᒃᑐᕕᓃᒃ ᐊᓈᓇᒌᒃ. ᐃᓕᐊᕐᔪᒃᓯᐅᑎᑎᒍᑦ ᖃᐅᔨᒪᓇᖅᑐᖅ ᐃᖅᑲᓇᐃᔭᖅᑎᕕᓂᐅᔭᕆᐊᖓᓂᒃ ᐱᒡᒐᕐᓇᖅᑐᒃᑯᑦ ᓄᒃᑕᖅᐸᒃᑐᕕᓂᖅ ᓄᓇᓕᖕᓄᑦ, ᐅᐊᓴᖅᑎᐅᓪᓗᓂ ᐃᖅᑲᓇᐃᔭᖅᐸᒃᑐᕕᓂᖅ,

ᐱᕈᖅᓰᕕᐅᖕᒪᑦ ᑕᐃᔅᓱᒪᓂ. ᔪᐊᔾ ᑰᒧ ᐱᕈᕐᓂᑰᕗᖅ ᐱᕈᖅᓰᕕᐅᔪᒥ, ᒥᐊᓂᖅᓯᔨᐅᕙᖢᓂ 17ᓂᒃ ᐅᑭᐅᖃᓕᖅᖢᓂ, ᐊᐃᑉᕆᓕ 1875ᒥ. ᑕᐃᔅᓱᒪᓂ, ᑭᓱᒨᒐᓗᐊᑭᐊᖅ, ᕿᒪᐃᓚᐅᕐᒪᑦ ᐱᕈᖅᓰᕕᖕᒥᒃ, ᐱᓱᒃᑐᕕᓂᐅᓪᓗᓂᓗ ᓅ ᓚᓐᑕᓐᒧᑦ ᐅᒥᐊᕐᔪᐊᒃᑰᓕᕐᓂᖅᖢᓂᓗ ᐅᑭᐅᖅᑕᖅᑐᒧᑦ ᐃᓚᐅᓪᓗᓂ

ᐊᕐᕙᒐᓱᒃᑎᓂ. ᐱᒋᐊᕐᓂᕆᓚᐅᕐᒪᒍᓕ ᐊᕐᕙᖕᓂᐊᖅᑎᐅᓂᕐᒥᒃ ᐅᒥᐊᖅᑐᖅᑎᐅᓂᕐᒧᓪᓗ, ᓯᕗᓪᓕᖅᐹᒥᒡᓗ

ᐅᑭᐅᖅᑕᖅᑐᒧᐊᕆᐅᖅᖢᓂ.

ᑰᒧ ᓯᕗᓪᓕᖅᐹᒥᒃ ᑲᐱᑕᐃᖑᓕᖅᖢᓂ, 1895ᒥ, ᐄᕋᒃᑯᑦ, ᐊᐅᓪᓚᓚᐅᖅᐳᖅ ᐅᒥᐊᕐᔪᐊᖅ ᑕᒪᓐᓇ ᖃᐅᔨᒪᔭᒻᒪᕆᒋᓪᓗᓂᐅᒃ. ᕼᐊᑦᓴᓐ ᐲᒧᐊᓚᐅᖅᐳᖅ, ᐊᕐᕌᒍᑦᑕᕌᖓᓪᓗ ᐱᒃᑯᓴᒻᒪᕆᓚᐅᖅᐳᖅ. ᐅᑎᖅᑕᖅᐸᒃᖢᓂ, ᕼᐊᑦᓴᓐ ᐲᒧᐊᖅᑕᓚᐅᖅᐳᖅ.

ᓄᐊᑦᑎᕙᓚᐅᕐᒪᑦ ᐱᕈᖅᑐᖏᓐᓂᒃ ᕼᐊᑦᓴᓐ ᐲᒥᑦ ᐊᒻᒪᓗ

ᕿᑭᖅᑖᓘᑉ ᒥᒃᓵᓂᑦ 1890ᖏᓐᓂ. ᐃᓅᓯᕐᒥᓂ ᓱᓇᐅᕝᕙ ᐱᓕᕆᐊᕆᓂᐊᓕᖅᑕᒥᓂ ᑲᔪᓰᓐᓇᓚᐅᖅᐳᖅ,

ᐃᓄᐃᑦ ᐃᓕᖅᑯᓯᖏᓐᓂᒃ ᐅᓂᒃᑲᐅᓯᓕᐅᖅᐸᒃᖢᓂ ᐃᓕᑉᐸᓪᓕᐊᔭᒥᓂᒃ. ᐱᕕᒡᔪᐊᖏᖢᓂ ᐱᒋᐊᕈᑎᒥᓂᒃ

ᓄᐊᑦᑎᕙᓪᓕᐊᕌᕐᔪᒃᐸᒃᖢᓂ ᑕᐅᖅᓯᕈᑎᒃᓴᒥᓂᒃ ᐱᖁᑎᑐᖃᐅᓕᖅᑐᑦ ᐊᑐᖅᑕᐅᕙᒃᑐᕕᓃᑦ ᐃᓄᖕᓄᑦ.

1897ᒥ ᐊᓯᔾᔨᕆᐊᕈᑎᖃᓚᐅᖅᐳᖅ ᑰᒨᑉ ᐃᓅᓯᖓ. 1897ᐅᓕᖅᑎᓪᓗᒍ, ᐊᖑᑦ ᑕᐃᔭᖅ ᕗᕌᖕᒃ ᐴᐊᔅ,

ᐃᓕᖅᑯᓯᑐᖃᓕᕆᔨᒻᒪᕆᒃ ᒥᐊᓕᒐᕐᓂ ᖃᐅᔨᒪᔨᑕᖅ, ᐃᓕᖅᑯᓯᑐᖃᓕᕆᓂᕐᒥᒃ ᐃᓕᓯᒪᔪᒻᒪᕆᒃ, ᓯᐸᐃᓱᒥᒃ

ᑲᐱᑕᐃᕕᓂᕐᒥᒃ ᑲᓱᖅᓯᓚᐅᖅᐳᖅ, ᑐᑭᓯᒃᑲᓐᓂᕈᒪᓪᓗᓂ ᐃᓄᐃᑦ ᐃᓕᖅᑯᓯᖓᓂᒃ ᐅᑭᐅᖅᑕᖅᑐᒥᐅᓂᒃ.

ᑲᐱᑕᐃᕕᓂᖅ ᑭᐅᓚᐅᖅᐳᖅ ᓄᖅᑲᕐᓂᑰᓕᕐᓂᕋᖅᖢᓂ ᑲᐱᑕᐃᓐ ᑰᒧᒧᑦ ᑎᒃᑯᐊᕈᑎᓪᓗᓂᐅᒃ.

ᐳᐊᔅ ᑐᐱᖅᓲᒪᓕᓚᐅᖅᑐᖅ ᑭᖑᓪᓕᕐᒥ ᐅᒥᐊᖅᑐᓕᕐᒥᒃᐸᑦ ᑰᒧ,\"ᐊᔾᔨᓕᐅᕆᓗᑎᑦ, ᓇᓗᓇᐃᖅᑐᖅᓯᒪᐅᕐᓗᒋᑦ, ᑮᓇᑉᐸᓕᐅᕆᕙᒡᓗᑎᓪᓗ ᒪᕋᐅᔭᕐᒥᒃ ᑮᓇᖏᓐᓂᒃ\". ᑕᐃᒪᐃᓕᐅᕐᓂᒃᑯᑦ, ᓇᓗᓇᐃᖅᑐᐃᖃᑦᑕᕐᓂᖓ ᐱᑐᐃᓐᓇᐅᔪᓃᓚᐅᖅᐳᖅ. ᑰᒧ ᓇᓗᓇᐃᓯᒪᔪᓂᒃ ᑎᑎᕋᖅᐸᓪᓕᐊᕙᓚᐅᖅᐳᖅ ᐃᓄᐃᑦ ᐃᓕᖅᖁᓯᖏᓐᓂᒃ.

ᐅᓂᑳᖅᓯᐅᖅᐸᒃᖢᓂ, ᓯᕗᓕᖏᑕ ᒥᒃᓵᓄᑦ ᐅᓂᑳᖅᓯᐅᖅᐸᒃᖢᓂ, ᕗᕌᖕᑭᓕᓐ ᓄᒃᑕᕐᓂᕕᓂᖏᓐᓂᒃ ᐅᓂᑳᖅᓯᐅᖅᐸᒃᑭᓪᓗᓂ, ᑎᑎᕋᐅᔭᖅᐸᒃᖢᓂ, ᓄᓇᙳᐊᓕᐅᖅᐸᒃᖢᓂ, ᑭᓱᑐᐃᓐᓈᓗᖕᓂᒃ ᐱᔪᓐᓇᖅᑕᒥᓂᒃ ᓄᐊᑦᑎᓇᓱᒃᐸᒃᖢᓂ. ᓄᐊᑕᓕᒫᐸᓗᖏᑦ ᒥᐊᓕᒐᐃᑦ ᐃᓕᖅᑯᓯᑐᖃᓕᕆᔨᖏᓐᓄᑦ ᐊᒡᒋᓯᕙᒃᑕᕕᓂᖏᑦ.

1907ᐅᓕᖅᑎᓪᓗᒍ 1908ᒥᓘᕝᕙᑭᐊᖅ, ᐅᓄᕐᓂᖅᐹᓂᒃ ᐅᑭᐅᖅᑕᖅᑐᒥᐅᑕᕐᓂᒃ ᓄᐊᑦᑎᓯᒪᓕᓚᐅᖅᐳᑦ

ᓯᓚᕐᔪᐊᕐᒥᐅᓕᒫᓂ, ᑕᒪᒃᑭᐸᓗᒃᖢᑎᒃ ᑰᒨᑉ ᓄᐊᖃᑦᑕᖅᑕᕕᓂᖏᓐᓂᒃ ᐊᒻᒪᓗ ᕌᐳᑦ ᐱᐅᕆᐅᑉ. ᑰᒧ

ᑕᐃᔭᐅᓕᓚᐅᖅᐳᖅ ᐃᓕᖅᑯᓯᑐᖃᓕᕆᔨᒥᒃ. ᑲᔪᓰᓐᓇᓚᐅᖅᐳᖅ ᐊᕐᕙᒐᓱᖕᓂᖓ ᑮᓇᐅᔭᓕᐅᕈᑎᒋᓪᓗᒍ,

ᑭᓯᐊᓂ ᐱᖃᑦᑎᓚᐅᖅᐳᖅ ᐃᖅᑲᓇᐃᔮᒃᓴᖓ ᐃᓕᖅᑯᓯᑐᖃᓕᕆᔨᐅᓂᕐᒥᒃ.

ᑐᐊᕋᑎ ᕼ. ᐄᐳ

ᐃᓄᑦᑎᐊᕚᓗᑦᑕᖃᓚᐅᖅᓯᒪᔪᖅ, ᓕᐊ ᐊᕐᓇᐅᔭᖅ, ᓇᐅᔮᕐᒥᐅᖅ - ᑭᖑᕚᖏᑦ ᓱᓕ ᑕᐃᑲᓂ ᐃᓅᔪᑦ - ᑕᐃᓐᓇ ᓕᐊ ᐊᖅᕕᒐᓲᑎᓂ ᐅᒥᐊᕐᔪᐊᓂ ᐃᑭᒪᕙᑦᑐᒥᓂᖅ ᐃᓅᓱᑦᑑᓪᓗᓂ. ᐅᓂᒃᑳᖃᕕᐅᑎᑉᐸᔪᔪᖅ ᐊᒥᐊᓕᑲᒃᑯᑦ ᑳᑉᑕᒥᓂᖓᓂᒃ ᔪᐊᔾ ᑰᒧᒥᓐ, ᑭᓯᐊᓂᓕᒎᖅ ᖃᐅᔨᒪᓂᖅᓴᒥᓂᕆᓪᓗᒋᒃ ᒧᕆᒥ ᐊᑎᕈᓯᓖᒃ ᓄᑲᕇᒃ ᐋᓕᐊᒃᓵᓐᑐ ᐊᒻᒪᓗ ᔮᓐ. ᐋᓕᐊᒃᓵᓐᑐ ᒧᕆᐅᑉ ᐸᓂᒥᓂᖓᒎᖅ, ᑭᓯᐊᓂᓕᒎᖅ ᐱᖃᑎᖃᕐᓂᖅᓴᐅᕙᑦᑐᒥᓂᖅ \"ᓇᑯᖓᔪᖅ\"-ᒥᑦ - ᔮᓐ ᒧᕆ ᐃᔨᖓ ᒪᑐᐊᖅᒪᕙᓐᓂᕐᖓᓐ. ᑰᒨᑉ ᐃᓄᑦᑎᑐᑦ ᐊᑎᒥᓂᖓ \"ᐊᖓᒃᑯᖅ\" ᐱᔾᔪᑎᒋᓪᓗᒍ ᑕᐸᐃᖅᑎᑦᑎᕙᓐᓂᕐᖓᓐ ᐃᓄᓐᓂᒃ ᐊᔾᔨᓐᖑᐊᒥᓄᑦ ᐅᒥᐊᕐᔪᐊᒥᓂ ᐊᔾᔨᓕᐅᖅᐸᑦᑕᒥᓂᖏᓐᓄᑦ (ᑰᒨᑉ ᐊᔾᔨᓐᖑᐊᖁᑎᖏᑦ ᐱᐅᓕᑦᑎᓂᑦᑎᐊᕚᓘᕗᑦ ᐃᓄᐃᑦ ᐃᓅᓯᕆᕙᑦᑕᒥᓂᖏᓐᓂᒃ ᑕᐃᔅᓱᒪᓂ) ᐊᒻᒪᓗ ᓕᐊᑉ ᐅᖃᐅᑎᔪᒑᖓ \"ᐆ, ᑰᒧ ᑕᐃᓐᓇ ᐊᖓᒃᑯᐊᓗᒃ! ᐸᐃᑉᐹᕈᓗᑐᐃᓐᓇᕐᓂᒃ ᐊᔾᔨᓐᖑᐊᓂᒃ ᓴᖅᑭᑎᑦᑎᕙᔪᔪᖅ! ᑕᐃᒃᑯᐊ ᑳᑉᑕᐃᑦ, ᑰᒧ ᐊᒻᒪᓗ ᐋᓕᐊᒃᓵᓐᑐ ᐊᒻᒪ ᔮᓐ ᒧᕆ, ᐃᓛᒃᑯᑦ ᐃᓄᖁᑎᖃᖅᐸᓚᐅᖅᑐᑦ ᐅᒥᐊᕐᔪᐊᑦ ᑎᑭᓯᒪᓕᕋᐃᒻᒪᑕ, ᐃᓄᐃᓪᓕ ᑐᓐᖓᓇᖃᑦᑕᐅᑏᓐᓇᕋᓗᐊᖅᑎᓪᓗᒋᑦ, ᐃᓚᔮᕇᖏᓐᓇᕈᔫᒐᒥᒃ, ᑲᑎᓗᐊᖅᐸᓂᓐᖏᑦᑐᑦ ᐊᖅᕕᒐᓱᐊᖅᑐᖃᖅᑎᓪᓗᒍ. ᑳᑉᑕᐃᑦ ᐃᓱᒫᓗᕈᔪᑉᐸᓂᕐᖓᑕ ᐊᓯᖏᑦ ᑳᑉᑕᐅᖃᑎᖏᑦ ᐊᖑᑎᖁᑎᖏᓐᓂᒃ ᐋᑦᑎᑕᖅᐱᐊᕐᖓᑕ. ᐊᑭᑦᑐᕋᐅᑎᓂᕐᓕ ᐱᔾᔪᑕᐅᓪᓗᓂ ᐊᑭᕋᕇᕌᓘᔪᓐᖏᑦᑑᒐᓗᐊᑦ, ᑭᓯᐊᓂᓕ ᑐᓐᖓᓇᖃᑦᑕᐅᑎᑦᑎᐊᖅᐸᔪᓐᖏᑦᑐᑦ.