ᐅᕙᓃᑦᑐᑎᑦ : ᐊᖏᕐᕋᖅ » ᑳᐱᑕᐃ ᐋᓕᒃᓵᓐᑐ ᒧᕋᐃ ᓄᑲᖅᓯᖅ.
ᑳᐱᑕᐃ ᐋᓕᒃᓵᓐᑐ ᒧᕋᐃ ᓄᑲᖅᓯᖅ.
ᑖᓐᓇ ᓯᑳᑦ ᔮᓐ ᒧᕋᐃ, ᐃᕐᓂᖓ ᐋᓕᒃᓵᓐᑑᑉ ᒧᕋᐃ ᐊᖏᔪᒃᓯᐅᑉ ᐊᒻᒪᓗ ᖃᑕᙳᑎᖓ ᐋᓕᒃᓵᓐᑐ ᒧᕋᐃᑉ , ᓱᕈᓯᐅᓂᕐᒥᓂ ᖃᑕᙳᑎᒌᒃ ᐅᒥᐊᕐᔪᐊᓃᖃᑦᑕᖅᓯᒪᔫᒃ ᐊᑖᑕᖓᑕ ᐊᐅᓚᑕᖏᓐᓂ. ᐋᓕᒃᓵᓐᑐ ᒧᕋᐃᑉ ᓄᑲᖅᓯᖅ, ᐃᓄᓐᓄᑦ ᑕᐃᔭᐅᕙᑦᑐᒥᓂᖅ "ᑳᐱᑕᐃ", ᐊᑯᓂᐅᙱᓂᖅᓴᖅ ᐃᖅᑲᓇᐃᔭᖅᑎᒥᓂᖅ ᖃᑕᙳᑎᒥᓂᒃ. ᐊᕐᕕᓐᓂᐊᖅᐸᓕᖅᑐᒥᓂᖅ 1890–ᖏᓐᓂ ᓂᐅᕕᖅᑎᒃᑯᑦ ᐅᒥᐊᕐᔪᐊᖓᓂ ᐊᑎᓕᒻᒥᒃ
ᐊᔪᐃᑦᓇᖅᑐᖅ (Perseverance) ᖃᑕᙳᑎᒌᒃ. ᐊᑯᓐᓂᖏᓐᓂ 1899 ᑎᑭᑦᓱᒍ 1912–ᒥ, ᐋᓕᒃᓵᓐᑐ ᒧᕋᐃ ᓄᑲᖅᓯᖅ ᐊᐅᓚᒃᓯᔨᐅᕕᒥᓂᖓ ᐅᒥᐊᕐᔪᐊᖅ ᐋᒃᑎᕝ ᐃᖅᑲᓇᐃᔭᖃᑎᖃᖅᐸᑦᓱᓂ ᖃᑕᙳᑎᒥᓂᒃ.
ᑲᐅᔾᔭᑯᓗᒃ, ᕿᒻᒥᕈᒻᒥ ᐊᑐᖅᓯᒪᔪᓂᒃ ᐅᓂᒃᑳᖅᑎ, ᐅᖃᓕᒪᖃᑎᓕᒥᓂᖅ ᐄᐳᒥᒃ ᐋᓕᒃᓵᓐᑐ ᒧᕋᐃ ᓄᑲᖅᓯᐅᑉ ᒥᒃᓵᓄᑦ, ᑖᓐᓇ ᐊᖑᑦ ᐃᓄᓐᓄᑦ ᐃᖅᑲᒋᔭᐅᑦᓯᐊᖅᑐᒥᓂᖅ.
ᐋᓕᒃᓵᓐᑐ ᒧᕋᐃ ᐋᒃᑎᕝ ᑳᐱᑕᐃᒥᓂᖓ. ᐃᓄᐃᑦ ᑕᐃᕙᑦᑕᒥᓂᖓ 'ᑳᐱᑕᐃᒥᒃ' ᐃᖅᑲᐅᒪᒋᓪᓗᓂᐅᓪᓗ ᑳᐱᑕᐃᑦᓯᐊᕙᐅᕙᓐᓂᕆᐊᖓᓂᒃ.'ᑭᒻᒥᕈᒻᒥ ᐊᑐᖅᐸᑦᑐᒥᓂᕐᓂᒃ ᐅᕙᑦᓯᐊᕈ ᐅᓂᒃᑳᖅᑎ ᑲᐅᔾᔭᑯᓗᒃ ᐅᓂᒃᑳᖅᑐᒥᓂᖅ, 'ᐆᒪᓇᕐᔪᐊᒥ ᓱᕈᓯᐅᕙᔪᔪᖅ. ᖃᓪᓗᓈᕋᓵᓗᐃᑦ ᑎᓄᔾᔨᕕᓕᐊᖅᐸᔪᒻᒪᑕ ᐅᒥᐊᕐᔪᐊᒃᑯᑦ, ᐊᑖᑕᖓᓗ ᐊᕐᕕᓂᐊᖅᑎᐅᓚᐅᖅᓯᒪᑦᓱᓂ ᐅᒥᐊᕐᔪᐊᖁᑎᖃᖅᓱᓂ. ᑕᐃᒪᐃᒪᓐ ᑳᐱᑕᐃ ᐱᕈᖅᓴᓚᐅᖅᓯᒪᔪᖅ ᐆᒪᓇᕐᔪᐊᕐᒥ ᐃᓕᓐᓂᐊᐸᑦᓱᓂᓗ ᐊᑖᑕᒥᓂᒃ ᖃᓄᖅ ᑳᐱᑕᐃᑦᓯᐊᕙᐅᒍᓐᓇᓂᕐᒥᒃ. ᐃᓄᑦᓯᐊᕙᐅᕙᔪᔪᖅ ᐃᓄᓐᓄᓐ. ᐱᕈᖅᓴ<ᐅᖅᓯᒪᔪᖅ ᐃᓄᐃᑦ ᐊᐅᓪᓛᖅᓯᒪᕕᒋᔭᖏᓐᓂ ᖃᐅᔨᒪᕙᔪᓪᓗᓂᓗ ᖃᓄᖅ ᐃᓅᓯᖃᕐᒪᖔᑦᑕ. ᐅᖃᕈᓐᓇᑦᓯᐊᖅᑲᑦᑕᑐᑦᓴᐅᓂᖅᑯᖅ ᐃᓄᒃᑎᑐᑦ. ᑲᐅᔾᔭᑯᓗᒃ ᑐᓴᖅᓯᒪᔪᖅ ᐋᓕᒃᓵᓐᑐ ᒧᕋᐃ ᓄᑲᖅᓯᐅᑉ ᐅᒥᐊᕐᔪᐊᖅ ᐊᐅᓚᒋᐊᙵᖅᑕᒥᓂᖓ ᐊᑖᑕᖓᑕ ᐅᒥᐊᕐᔪᐊᑐᖃᒥᓂᖓ, ᐊᑎᓕᒃ ᐅᐃᓐᐅᐊᑦᒥᒃ (Windward) ᐊᓯᔾᔨᖅᑕᐅᓚᐅᖅᑐᒥᓂᖅ ᑎᖅᑎᑦᑐᒧᑦ ᐳᔫᖅᑐᓂᒃ ᐊᐅᓚᐅᑎᓕᒻᒧᑦ ᑕᐃᒃᓱᒨᓇ ᐃᓇᖏᐅᑎᑎᓪᒍ.
ᐋᓕᒃᓵᓐᑐ ᒧᕋᐃ ᓄᑲᖅᓯᐅᑉ ᖃᓄᖅ ᑐᖁᓐᓂᕐᒪᖓᖅ ᖃᐅᔨᒪᔭᐅᙱᑦᑐᖅ ᒫᓐᓇᒧᓄᓐ. ᐳᔫᖅᑐᖅ ᑎᖅᑐᒧᑦ ᐅᒥᐊᕐᔪᐊᖅ ᐋᒃᑎᕝ ᐅᑭᐅᖅᓯᐅᑎᓕᕆᐊᓯᒪᓪᓚᕆᓐᓂᖏᑦᑐᖅ ᐅᑮᒍᑎᒋᓂᐊᕐᓗᒍ ᓯᑯᒥ, ᑕᐃᒪᐃᒻᒪᓐ ᐋᓕᒃᓵᓐᑐ ᒧᕋᐃ ᐅᑎᕐᔭᕋᔪᑉᐸᑦᑐᒥᓂᖅ ᑖᒃᑯᓄᖓ ᑲᖏᖅᓱᐊᓗᒻᒧᑦ ᓯᑳᓪᓚᒧᓪᓗ ᓂᐅᕐᕈᑎᒥᓂᒃ ᐋᑦᓯᕕᒋᓪᓗᓂᖏᑦ ᐊᕐᕕᓕᕆᕖᑦ ᓇᒻᒥᓂᖏᑦ ᑭᓐᓂᔅ. 1912–ᖑᑎᓪᓗᒍ, ᓱᓕ, ᐋᓕᒃᓵᓐᑐ ᒧᕋᐃ ᐅᑮᒍᒪᓯᔪᒥᓂᖅ ᐅᒥᐊᕐᔪᐊᓂ ᐋᒃᑎᕝ ᐅᑮᒍᑎᓪᓗᓂᐅᑉ ᑲᖏᖅᓱᐊᓗᒻᒥ, ᓇᓗᓇᐃᖅᓯᒪᓂᖅᓴᖅ ᐅᑮᕕᒋᓂᖅᓴᕆᕙᓐᓂᕆᐊᖓᓂᐅᒃ ᐋᑐᕚ ᕿᑭᖅᑕᖏᓐᓂ. ᒪᓕᒃᓱᒋᑦ ᑕᐅᑐᑦᑐᒥᓃᑦ ᐅᖃᐅᓯᒥᓂᖏᑦ ᑐᖁᑎᓪᓗᒍ, ᑳᐱᑕᐃ ᑐᖁᔪᒥᓂᖅ ᓅᕙᐃᒻᕙ 11, 1912–ᒥ, ᐋᓐᓂᐊᓂᕐᒧᓐ ᐃᒻᒪᖄ ᐃᒥᐊᓗᓗᐊᖃᑦᑕᓂᕐᒧᓐ. ᐃᕐᓂᖓ ᐃᑭᓪᓗᐊᖅ ᕿᒻᒥᕈᒻᒥᐅᖅ ᐅᓂᒃᑳᕆᔭᒥᓂᖓ ᐄᐳᒧᑦ ᑕᒪᓐᓇ. "ᑳᐱᑕᐃ ᑐᖁᔪᔪᖅ ᑭᖑᓪᓕᖅᐹᒥ ᐃᖏᕐᕋᔪᒥᓂᐅᓪᓗᓂ. ᐅᑭᐅᕈᔾᔭᐅᓚᐅᕐᓇᑕ, ᑳᐱᑕᐃ ᑐᖁᖓᓕᕇᔪᔪᖅ. ᑐᖁᕙᓪᓚᐃᓂᖏᑦᑐᖅ ᐊᓐᓂᐊᓂᕐᒧᓐ ᑭᓯᐊᓂ ᐃᒥᐊᓗᒻᒧᓐ, ᐊᒃᓱᖏᖅᑐᖅᑕᐅᓯᒪᔪᒥᓂᖅ ᐃᖅᑲᓇᐃᔭᖅᑎᖁᑎᒥᓄᑦ. ᑲᑉᐱᐊᒋᔭᐅᔪᒃᓴᐅᓐᓂᕋᒥ ᓱᒻᒪᑦ ᐊᒃᓱᖏᖅᑐᖅᑕᓂᕐᒪᖔᒍ, (Eber 1989: 142). ᐅᓪᓗᒥᒧᑦ ᓱᓕ, ᐋᓕᒃᓵᓐᑐ ᒧᕋᐃ ᓄᑲᖅᓯᐅᑉ ᓴᐅᓂᒥᓂᖏᓐ Etoile ᑲᖏᖅᓱᖓᓃᑦᑐᑦ ᐋᑐᕚᑉ ᕿᑭᖅᑕᖏᓐᓂ.