ᐅᕙᓃᑦᑐᑎᑦ : ᐊᖏᕐᕋᖅ » ᐊᖑᑎᒻᒪᕆᒃ (ᓯᑳᔅ-ᑖᒻ) (Scotch Tom)
ᐊᖑᑎᒻᒪᕆᒃ (ᓯᑳᔅ-ᑖᒻ) (Scotch Tom)
ᐊᖑᑎᒻᒪᕆᒃ, ᖃᐅᔨᒪᔭᐅᖃᓯᐅᑎᒻᒥᔪᖅᑕᐅᖅ ᓯᑳᔅ ᑖᒻ–ᖑᓂᖓᓂᒃ, ᐃᖅᑲᓇᐃᔭᖅᑐᒥᓂᖅ ᐊᕐᕌᒍᕋᓴᓐᓂᒃ ᐱᔨᒋᔭᐅᓪᓗᓂ ᓯᒃᑳᓯᒥᐅᒧᑦ ᔮᓐ ᒧᕋᐃᒧᑦ. ᐃᓅᖃᑕᐅᓪᓗᓂ ᐱᖓᔪᒋᔭᐅᓪᓗᓂ ᐃᓅᓄᑦ ᖃᖏᖅᓱᐊᓘᑉ ᐅᐊᓐᓇᖅᐸᓯᖓᓃᙶᖅᓯᒪᓪᓗᓂ ᐃᑲᔪᖃᑕᐅᓪᓗᓂ ᒧᕋᐃ ᓄᑲᕇᓐᓂᒃ ᓴᓪᓕᒥ ᒪᑐᐃᖅᓯᑦᓱᑎᒃ ᕌᐳᑦ ᑎᓐᓂᔅ ᐃᕐᓂᕇᓪᓗ ᐱᓕᕆᕕᒻᒥᒃ (ᑕᓐᑏ) ᐊᕐᕕᓕᕆᒥᒻᒥᒃ 1899–ᖑᑎᓪᓗᒍ. ᐅᑯᐊ ᑕᒡᒐ ᐅᖃᐅᓯᒥᓂᖏᑦ ᔫ ᑰᓕᐅᑉ (ᖃᔭᕐᔪᐊᖅ) ᑎᒍᐊᖅᑎᒥᓂᕐᒥ ᒥᒃᓵᓄᑦ, ᐅᓂᒃᑳᒥᓂᖅ ᐄᐳᒧᑦ:
ᐊᑖᑕᒐ ᑳᐱᑕᐃᑉ ᐱᔨᒋᕙᔪᔭᖓ. ᑕᐃᒃᓱᒨᓇᓕ ᓯᒃᑳᔅ ᒥᐊᓕᒐᐃᓪᓗ ᐃᓄᓐᓂᒃ ᓯᕗᓕᖅᑎᖃᖅᐸᔪᒻᒪᑕ, ᐊᑖᑕᒐᓗ ᓯᑳᓯ ᑖᒻ, ᐊᖓᒐ ᑎᒍᐊᖅᑎᒥᓂᕋ – ᐃᓄᒃᑎᑐᑦ ᐊᑎᖃᔪᔪᖅ ᐊᖑᑎᒻᒪᕆᒃᒥᒃ – ᑲᒪᔨᐅᑎᑕᐅᕙᔪᔪᖅ ᓯᒃᑳᑦᓯᒦᙶᖅᓯᒪᔪᓂᒃ. ᑕᐃᒫᒃ ᐱᖅᑯᓯᖃᖅᐸᓂᕐᒪᑕ ᐅᕙᑦᓯᐊᕈ. ᐊᕐᕕᓂᐊᖅᑏᑦ ᓂᕈᐊᖅᐸᑦᑐᒥᓃᑦ ᐊᖓᔪᖅᑳᕆᓂᐊᖅᑕᒥᓐᓂᒃ. ᐊᖑᑎᒻᒪᕆᒃ ᐃᓅᓱᑦᑐᐹᓘᓪᓗᓂ, ᓯᒃᑳᑦᓰᑦ ᑎᑭᖃᑦᑕᕆᐊᖓᓕᖅᑎᓪᓗᒋᑦ ᑕᒪᐅᖓ ᐊᔾᔨᒌᖏᑦᑐᓄᑦ ᐊᐅᓪᓛᖅᓯᒪᕕᐅᔪᓄᑦ, ᐃᖅᑲᓇᐃᔭᖅᑎᑖᖑᓚᐅᖅᑐᒥᓂᖅ ᑖᒃᑯᓄᖓ ᐊᖑᓇᓱᐊᕈᓐᓇᑦᓯᐊᕐᓂᖓᓄᑦ ᑕᑎᒃᓴᒃᓯᐊᕙᐅᓂᖓᓄᓪᓗ. (Eber 1989: 108)
ᐊᖑᑎᒻᒪᕆᒃ ᐊᖑᓇᓱᐊᖅᑎᒃᓯᐊᕙᑐᐃᓐᓇᐅᓂᙱᑦᑐᖅ, ᑭᓯᐊᓂᑦᑕᐅᖅ ᐊᖓᒃᑰᓂᖓᓂᒃ ᖃᐅᔨᒪᔭᐅᕙᓐᓂᕐᒥᔪᖅ. ᒪᓕᒃᓱᒋᑦ ᐅᓂᒃᑳᖑᓯᒪᔪᑦ ᑲᑎᖅᑎᖅᓯᒪᔭᖏᑦ ᐃᐊᐴᑉ, ᐊᖑᑎᒻᒪᕆᒃ "ᐃᖅᑲᐅᒪᔭᐅᔪᖅ ᐊᖓᒃᑯᔾᔪᐊᒥᓂᐅᒋᐊᖓ 'ᐃᑲᔪᖅᓯᒪᔪᒥᓂᐅᑐᐃᓐᓇᕆᐊᓕᒃ ᐊᕐᕕᓐᓂᒃ ᑎᑭᑎᒃᓯᖃᑦᑕᖅᓱᓂ. [...]ᐊᖓᒃᑯᐃᑦ ᖃᐅᔨᒪᕙᓐᓂᕐᒪᑕ ᓇᒦᒻᒪᖔᑕ ᐊᕐᕖᑦ'” (Eber 1989: 37). ᒪᓕᒃᓱᒋᑦ ᐅᖃᐅᓯᒥᓂᖏᑦ ᑎᒍᐊᖓᑕ ᐃᕐᓂᖓᑕ, ᔫ ᑰᓕᐅᑉ (ᖃᔭᕐᔪᐊᖅ), ᓯᒃᑳᑦᓯᒦᙶᖅᓯᒪᔪᑦ ᐱᖁᑎᖃᐅᑦᓯᐊᖏᓐᓂᖅᓴᒥᓃᑦ ᒥᐊᓕᒐᒥᐅᓂᒃ, ᐊᑭᓕᐅᔾᔭᒃᓴᖃᑦᓯᐊᖅᐸᓂᙱᑦᑐᑦ ᐃᖅᑲᓇᐃᔭᖅᑎᖁᑎᒥᓐᓄᑦ. ᑕᐃᒪᐃᒐᓗᐊᕐᒪᓐ, ᐊᖑᑎᒻᒪᕆᒃ ᓇᒻᒥᓂᕐᒥᓂᒃ ᐅᒥᐊᓕᒥᓂᖅ ᐊᒥᓱᒐᓚᓐᓂᓪᓗ ᐊᖑᓇᓱᐊᕈᑎᓂᒃ ᓱᒋᐅᑎᓂᒃ, ᐊᒻᒪᓗ, ᐊᕐᕕᓂᐊᖅᑏᑦ ᑭᖑᓂᖓᒍᑦ, ᐅᑎᓚᖓᒍᓐᓃᖅᓱᑎᒃ ᐊᐅᓪᓚᕋᓗᐊᕐᒪᑕ, ᑐᔫᓯᐊᖅᐸᑦᑐᒥᓂᖅ ᔮᓐ ᒧᕋᐃᒥ, ᐊᖑᑎᒻᒪᕆᒃ ᑐᖁᖏᓂᕐᒥᓂ ᐃᓪᓗᒥᐅᖃᑎᖃᖅᐸᑦᑐᒥᓂᖅ ᓂᕕᓯᓈᕐᒥᒃ, ᐅᐃᒡᒐᕐᓂᒥᓂᖅ 1905–ᒥᓂᒃ. ᐊᓱᐃᓪᓛᒃ, ᐊᖑᑎᒻᒪᕆᒃ ᑐᖁᔪᒥᓂᖅ ᓴᓪᓕᒥ 1940–ᖏᓐᓂ ᐊᕐᕌᒍᐃᑦ, ᖁᓕᓪᓗᐊᒐᓚᐃᑦ ᑐᖔᒍᑦ ᑐᖁᔪᒥᓂᐅᑎᓪᓗᒍ ᓂᕕᓯᓈᖅ.