You are here: Home
ᐃᓚᖏᓪᓗ ᐱᓗᐊᖅᑐᑎᑦ. ᐅᑯᐊᖑᒻᒪᑕ ᓯᕗᓕᖃᕋᑦᑕ ᐊᒥᓱᐊᓗᓐᓂᒃ ᐊᕐᕕᓂᐊᖅᑎᒥᓂᕐᓂᑦ. ᓇᒻᒥᓂᕆᓪᓗᒋᓪᓗ ᐃᓚᖏᓪᓗ ᓇᒻᒥᓂᕆᓐᖏᑕᕋᓗᐊᕗᑦ. ᐅᕙᖓᓕ ᓇᒻᒥᓂᖅ ᓯᕗᓕᖃᕋᒪ ᑕᐃᒃᑯᓂᖓ ᐊᕐᕕᓂᐊᖅᑎᒥᓂᕐᓂᑦ ᑕᐃᑲᓐᖓᓪᓗ ᐊᑖᑕᒪ ᐃᓚᒥᓂᖏᓐᓂ ᐊᒻᒪᓗᑦᑕᐅ ᐊᓈᓇᒪ ᐃᓚᒥᓂᖏᑦ. ᑕᐃᒃᑯᐊ ᐊᑖᑕᒪ ᐃᓚᒥᓂᖏᑦ ᐊᕐᕕᓂᐊᖅᑎᐅᖃᑦᑕᖅᑐᒥᓃᑦ ᐊᕙᓐᖓᑦ ᑭᒻᒥᕈᒻᒥᑦ ᐊᐃᔭᐅᖃᑦᑕᓂᕐᒪᑕ ᐊᕗᖓ ᑭᕙᓪᓕᕐᒨᕈᔾᔭᐅᕙᑦᑐᑎᒃ. ᐅᐱᓐᓇᕋᓂᕉᖅ ᐃᑲᔪᖃᑦᑕᖅᑐᒥᓂᐅᒻᒪᑕ ᐊᒻᒪᓗ ᐃᓕᓐᓂᐊᑎᑦᑎᖃᑦᑕᖅᑐᒥᓂᐅᓪᓗᑎᒃ ᑖᒃᑯᓂᖓ ᐊᕐᕕᓂᐊᖅᑎᐊᓗᓐᓂᒃ. ᐊᒻᒪᓗ ᑕᒪᓐᓇ ᐃᒫᓘᒻᒪᑦ ᑕᐃᒪᒎᖅ ᑕᐃᒃᑯᐊ ᑎᑭᕋᑖᒥᓃᑦ ᖃᐅᔨᒪᑦᓯᐊᖃᑦᑕᓂᓐᖏᒻᒪᑕ ᑕᒪᑐᒥᖓ ᐃᒪᕕᒻᒥᑦ. ᑕᐃᒃᑯᓄᖓ ᓯᕗᓕᖅᑎᓐᓄᑦ ᐊᔪᕆᖅᓲᔭᐅᕙᒃᑐᒥᓃᑦ ᓇᒦᒻᒪᖔᑕ ᑕᐃᒃᑯᐊ ᐊᕐᕕᐊᓗᐃᑦ. ᐊᕙᓃᑦᑕᖅᑯᑦ, ᐊᕙᓃᑦᑕᖅᑯᑦ, ᐊᕙᓃᑦᑕᖅᑯᑦ. ᑕᐃᒃᑯᐊ ᖃᐅᔨᒪᔪᑑᖃᑦᑕᕐᓂᕐᒪᑕ ᓯᕗᓕᕗᑦ ᓇᒥ ᐊᕐᕕᖃᑦᑕᕐᒪᖔᖅ. ᑖᓐᓇᐅᑦᑕᕐᒪᓪᓗ. ᑕᐃᓐᓇ ᐋᓇᒪ ᖁᕕᐊᓇᖅᑐᑯᓘᑉ ᓄᑲᒥᓂᖓ ᐃᓅᒻᒪᕆᓚᐅᖅᓯᒪᒻᒪᑦ ᐊᓂᕐᓂᖅ. ᑕᐃᓐᓇ ᐊᖑᓚᐅᖅᓯᒪᔭᕋ ᐊᓂᕐᓂᖅ ᐊᓈᓇᑦᓯᐊᕆᓪᓗᒍᓗ ᐋᓇᒪ ᓄᑲᕆᕐᓂᕐᒪᐅᒃ. ᑕᐃᓐᓇᒎᖅ ᐅᒥᐊᕐᔪᐊᒥ ᐊᕐᕕᓂᐊᖅᑎᐊᓗᐃᑦ ᐅᒥᐊᕐᔪᐊᖓᓐᓂ ᐃᓅᓚᐅᖅᓯᒪᒻᒪᑦ ᐊᓂᕐᓂᖅ. ᑕᐃᓐᓇ ᐅᓂᒃᑳᕆᔭᐅᓲᖑᒻᒥᔪᖅ. ᑕᐃᓐᓇ ᐊᖑᔮᐱᒋᓚᐅᕋᒃᑯᑦ ᐊᓂᕐᓂᖅ ᑭᙵᕐᓂ ᑲᑎᒪᖃᑦᑕᓕᓚᐅᖅᓯᒪᒻᒥᔭᕋ 1970-ᐅᓕᖅᑎᓪᓗᒍ. ᐊᒻᒪᓗᑦᑕᐅᑦ ᑕᐃᒃᑯᐊ ᐃᓚᓪᓚᕆᐊᓗᒃᑲ ᓯᕗᓕᓪᓚᕆᒃᑲ ᐊᓂ ᑭᒪᓗᒃ ᐊᒻᒪᓗ ᔮᓂ ᐴᒃ. ᑖᒃᑯᐊ ᑖᓐᓇ ᐅᐃᖓ ᔮᓂ ᐴ ᐊᕐᕕᓂᐊᖅᑎᓂ ᐃᑲᔪᖃᑦᑕᖅᑐᒥᓂᐅᒻᒥᒻᒪᑦ ᑕᑉᐹᓂ ᐸᓐᓂᖅᑐᑉ ᓯᓚᑖᓂ ᕿᑭᖅᑕᓂᖃᐃ, ᕿᑭᖅᑕᓂ. ᐆᒻᒪᓈᕐᔪᐊᒻᒥᓪᓗ. ᒥᐊᓕᒐᕐᓂᓪᓗ ᓯᑳᑦᓯᓂᓪᓗ ᐃᑲᔪᖃᑦᑕᖅᑐᒥᓂᐅᒻᒥᔪᖅ. ᑕᐃᒫᑦᑕᐅ ᐃᓕᓐᓂᐊᑎᑉᐸᑦᑐᒋᑦ ᓇᒦᒻᒪᖔᑕ ᐊᕐᕕᐊᓗᐃᑦ ᖃᓄᑐᐃᓐᓇᑦᓯᐊᖅ. ᑖᓐᓇ ᐅᓂᒃᑳᕆᔭᐅᖃᑦᑕᖅᓯᒪᔪᖅ ᔮᓂ ᐴ. ᐃᓛᒎᖅ ᑕᑯᓐᓈᓚᐅᖅᓯᒪᔪᒥᓂᐅᒻᒪᑦ ᐊᕐᕕᓂᐊᖅᑎᐅᖃᑎᐊᓗᒻᒥᑦ ᐊᕐᕕᖏᓐᓂ ᑎᓪᓕᑦᑐᖃᑦᑎᓪᓗᒍ ᖃᓪᓗᓈᖑᖃᑎᒥ ᐊᕐᕕᑦᑕᒥᓂᖏᓐᓂᒃ. ᑕᐃᒃᑯᐊ ᑎᓪᓕᒐᖅᑐᒥᓈᓘᒻᒪᑕ ᑕᑯᓐᓈᖅᑐᒥᓂᐅᒻᒪᑦ ᑖᓐᓇ ᔮᓂ ᐴ. ᑕᐃᒪ ᑕᐃᒪᒎᖅ ᖃᓪᓗᓈᑦ ᓄᓇᖓᓐᓄᑦ ᐊᐅᓪᓚᕈᔾᔭᐅᖃᑦᑕᓚᐅᖅᓯᒪᕗᖅ ᒪᕐᕈᐊᖅᑎᒻᒪᕆᑦᑐᓂ, ᒪᕐᕈᐊᖅᑎᑦᑐᓂ ᑐᓴᐅᒪᔪᖓ. ᑕᐃᒃᑯᐊ ᐃᖅᑲᑐᖅᑕᐅᒋᐊᓕᐊᓘᓕᖅᑎᓪᓗᒋᑦ ᑎᓪᓕᑦᑐᒥᓃᑦ. ᑖᓐᓇᖃᐃ ᔮᓂ ᐴ ᖃᓪᓗᓈᑎᑐᑦ ᖃᐅᔨᒫᕐᔪᑦᑐᒥᓂᐅᓐᓂᕐᒪᑦ ᐃᓕᓐᓂᕋᒥ ᑖᒃᑯᓂᐊ ᐊᕐᕕᓂᐊᖅᑎᓂᒃ. ᑕᐃᒫᒃ ᖃᓪᓗᓈᑦ ᓄᓇᖓᓐᓄᐊᕈᔾᔭᐅᔪᒥᓃᑦ ᓄᓕᐊᖓᓗ ᑕᐃᓐᓇ ᑭᒪᓗ, ᐊᓂᒥᓪᓕ ᐊᑎᖃᖅᑎᑕᐅᓕᕐᓂᕐᒥᔪᖅ. ᑕᐃᓐᓇ ᓯᓚᐱᕈᕆᓚᐅᖅᑕᕋ ᑲᓪᓛᕐᔪᒃ 1953-ᒥ ᐃᓅᒍᓐᓃᖅᑐᒥᓂᖅ. ᑕᐃᓐᓇᒎᖅ ᓂᕕᐊᖅᓯᐊᕈᓘᑎᓪᓗ ᑖᕗᖓᐅᒃᔭᐅᖃᑦᑕᖅᑐᒥᓃᑦ ᐹᔅᑕᓐᒧᑦ ᑕᐅᓄᖓᐅᔾᔭᐅᖃᑦᑕᖅᑐᓃᑦ ᐅᒥᐊᕐᔪᐊᒃᑯᑦ ᑕᐃᒃᑯᐊ ᐃᖅᑲᖅᑐᖅᑕᐅᓛᖅᑐᓕᖅᑎᓪᓗᒋᑦ ᑎᓪᓕᒐᕐᓂᕋᖅᑕᒥᓃᑦ. ᑕᐃᒪ ᐅᓂᒃᑳᖅᑕᐅᓂᕋᖅᑕᐅᕙᓚᐅᕐᒪᑦ ᑲᓪᓚᕐᔪᒃ ᓯᓚᐱᕈᕋ ᑕᒪᑐᒥᖓ ᖃᓪᓗᓈᑦ ᓄᓇᖓᓐᓂ ᑕᑯᔭᕆᐅᖅᑐᑎᒃ. ᑖᕗᖓᖅᑐᐊᓘᒻᒪᑕᖒᖅ ᓯᓈᓃᒻᒪᑕᒎᖅ ᑖᕙᒃᑯᐊᓕᖒᖅ ᐃᑯᒫᓗᐃᑦ ᐊᕗᖔᓗᒃ ᐊᕗᖔᓗᒃ ᐃᑯᒫᓗᐃᑦ, ᑕᐃᒫᒃ ᐅᓂᒃᑲᕐᓂᕋᖅᑕᐅᕙᔪᔪᖅ ᑭᖓᕐᓃᓕᖅᑎᓪᓗᑕ.
ᑕᒪᒃᑮᓐᓂ ᓯᕗᕚᖏᓐᓂ, ᐋᓐ ᒥᑭᔾᔪᒃ ᕼᐊᓐᓴᓐ ᐊᖅᕕᒐᓱᐊᖅᑎᒥᓂᖅᑕᖃᖅᐳᖅ ᑎᑎᕋᖅᓯᒪᔪᓂ. ᓇᓗᓇᐃᖅᑐᐃᔪᖅ ᖃᓄᖅᑎᒋ ᐃᓄᐃᑦ ᐊᖅᕕᒐᓱᐊᖅᑎᓄᑦ ᐱᒻᒪᕆᐅᓂᖃᖅᑎᒋᓐᓂᕐᒪᖔᑕ ᐃᓕᓴᐃᔨᐅᓪᓗᑎᒃ ᐅᑭᐅᖅᑕᖅᑐᒥ ᐃᒪᕕᒻᒥᒃ ᐊᖅᕕᓐᓂᓪᓗ. ᐅᓂᒃᑳᖃᕐᒥᔪᖅᑕᐅᖅ ᐅᓂᒃᑳᕆᔭᐅᓲᒥᒃ ᔮᓂᕘᒥ ᑭᒥᓗᒥᓪᓗ ᑕᐃᒃᑯᓂᖓ ᕚᔅᑕᓐᓕᐊᖅᑐᒥᓃᓐᓂᒃ ᐃᖅᑲᖅᑐᐃᔪᓄᑦ ᑕᑯᓐᓈᖅᑐᒥᓂᐅᓂᖏᓐᓄᑦ ᐅᓂᒃᑳᖅᑎᑕᐅᔭᖅᑐᖅᑐᑎᒃ ᐃᖅᑲᑐᖅᑕᐅᔪᖃᖅᑎᓪᓗᒍ ᐊᖅᕖᒃ ᑎᓪᓕᒑᒥᓂᖅ ᐱᔾᔪᑕᐅᓪᓗᓂ.
ᐊᕐᕕᓂᐊᑏᑦ ᓯᕗᓕᕆᒻᒥᔭᕗᑦᑕᐅᖅ
169 Ko
ᐅᑭᐅᖅᑕᖅᑑᑉ ᑲᓇᓐᓇᖓ
ᑕᐃᒪ ᐅᖃᖅᑲᐅᒐᒪ ᓯᕗᓪᓕᖅᐹᒥᒃ ᐃᓄᕋᓵᓘᓪᓗᑕ ᑕᒫᓂ ᐅᑭᐅᖅᑕᖅᑐᒥ ᓯᕗᓕᖃᕋᑦᑕ ᐊᕐᕕᓐᓂᐊᖅᑎᒥᓂᕐᓂᒃ. ᑕᒪᓐᓇ ᐱᒻᒪᕆᐅᓐᓂᕋᖅᑲᐅᔭᕋ. ᑕᐃᒫᑦᑕᐅᖅ ᐅᓂᒃᑳᑐᐃᓐᓇᕐᓂᒃ ᖃᐅᔨᒪᔪᐃᑦ ᑐᓴᖃᑦᑕᖅᓯᒪᔪᒍᑦ. ᐅᓂᒃᑳᕐᕕᐅᖃᑦᑕᖅᓯᒪᒐᑦᑕ ᐅᕙᑦᑎᓐᓂᒃ ᐊᖓᔪᑦᑎᐅᔪᓂᒃ ᑐᓴᐅᒪᓂᖅᓴᓂᒃ. ᐄ, ᐅᑭᐅᖅᑕᖅᑐᓕᒫᒥ ᐊᕐᕕᓐᓂᐊᖅᑎᖃᖅᑐᒥᓂᖅ, ᓄᓇᒥ ᐊᑕᐅᓯᐅᙱᑦᑐᒥ ᑭᕙᓪᓕᕐᒥ, ᑭᒻᒥᕈᒻᒥ, ᐸᓐᓂᖅᑑᑉ ᓯᓚᑖᓂ, ᖁᑦᑎᓂᖅᓴᒥᓗ. ᑕᒪᒃᑯᐊᒥᓂᐅᒻᒪᑕ. ᑕᒪᓐᓇ ᖃᐅᔨᒪᓚᕿᒻᒥᔭᕗᑦ ᐅᓂᒃᑳᑐᐃᓐᓇᐅᙱᑦᑐᒃᑯᑦ.
ᑕᐃᒪ ᐊᐅᓪᓛᖅᓯᒪᓪᓗᑕ, ᑕᒪᓐᓇᓕ ᐃᒪᕕᐅᑦᑕᕐᖓᑦ. ᑕᐃᒫ ᐊᐅᓪᓚᖅᓯᒪᒐᐃᒐᑦᑕ, ᑕᒪᓐᓇ ᑕᒻᒫᕐᕕᕗᑦ ᐊᐅᔭᒃᑯᑦ ᐃᓛᒃ ᐱᓗᐊᖅᑐᓂ. ᐊᕐᕕᒥᓈᓗᓐᓂᒃ ᓴᐅᓂᖅᑕᖃᓲᖑᒻᒪᑕ, ᑕᒪᓐᓇ ᖃᐅᔨᒪᓇᕐᒥᔪᖅ, ᓇᒥᓕᒫᖅ ᐊᕐᕕᓐᓂᐊᖅᑎᑕᖃᖅᑐᒥᓂᐅᒋᖓ ᓯᕗᓕᑦᑎᓐᓂ.
ᐅᓇᑦᑕᐅᖅ ᖃᐅᔨᒪᒻᔭᕗᑦ, ᖃᓪᓗᓈᖅᑕᖃᓚᐅᕐᓂᐊᖅᑎᓐᓇᒍ, ᐃᓄᐃᑦ ᑕᐃᒃᑯᐊᓗ ᓯᕗᓕᒥᓂᕗᑦ ᑐᓂᖅᑲᐃᑦ, ᑐᓂᐅᓂᕋᖅᑕᐅᓲᑦ. ᑕᐃᒃᑯᐊ ᐊᕐᕕᖃᑦᑕᖅᑐᒥᓈᓘᒻᒪᑕ, ᑕᐃᒃᑯᐊ ᐃᓪᓗᕐᔪᐊᒥᓈᓗᐃᑦ ᖃᓇᖃᓲᖑᒻᒥᔪᑦ ᐊᕐᕖᑦ ᓴᐅᓂᒥᓂᖏᓐᓂᒃ, ᑐᓕᒫᕕᓂᖏᓐᓂᓪᓗ.
ᐄ, ᑕᒪᓐᓇ ᖃᐅᔨᒪᑦᑎᐊᖅᑕᕗᑦ ᑕᐃᑲᙵᓂᓕᒫᖅ ᑐᓴᐅᒪᓪᓗᒍᓗ ᑐᓴᐅᒪᔭᐅᑎᓪᓗᒍᓗ ᕿᑐᕐᖓᑦᑎᓐᓄᑦ ᐃᕐᖑᑕᑦᑎᓐᓄᑦ. ᑖᕗᖓᓕᒫᖅ ᑐᓴᐅᒪᔭᐅᑉᐸᑦ ᐊᑲᐅᓂᖅᓴᐅᒐᔭᖅᑐᖅ, ᐅᐱᓐᓇᕋᓂ ᓯᕗᓕᕗᑦ ᐃᓚᕗᑦ ᑕᐃᒃᑯᐊᖑᓐᓂᕐᖓᑕ.
ᐃᒫᒃ ᑐᓴᐅᒪᓇᖅᑐᖅ ᑕᒪᒃᑯᐊ ᐃᓄᐃᑦ ᐃᓄᕋᓴᐃᑦ ᐃᑲᔪᖅᑎᒋᔭᐅᔪᒪᖃᑦᑕᕐᓂᕐᖓᑕ. ᐅᐱᓐᓇᕋᓂ ᖃᐅᔨᒪᓂᖅᓴᐅᒻᒪᑕ ᑕᒪᒃᑯᓂᖓ ᑎᑭᑐᐃᓐᓇᖃᑦᑕᖅᑐᓂᒃ. ᑕᒪᒃᑯᐊᓕ ᐃᓄᐃᑦ ᑕᒫᓂ ᓄᓇᒥᐅᖑᑦᑕᕋᒥᒃ ᖃᐅᔨᒪᑦᑎᐊᕋᒥᒃ ᓄᓇᓕᒫᓂᒃ, ᕿᑭᖅᑕᓂᒃ, ᑰᖕᓂᒃ, ᑕᓯᕐᓂᒃ ᓱᓇᓕᒫᑦᑎᐊᓂᒃ, ᐅᐱᓐᓇᕋᓂ ᐃᑲᔪᑦᑎᒋᔭᐅᖃᑦᑕᕐᓂᕐᖓᑕ ᐊᒻᒪᓗ ᐃᓕᓐᓂᐊᖅᑎᑦᑎᑦᑎᐊᖅᓱᑎᒃ. ᑕᐃᒃᑯᐊ ᐃᓄᐃᑦ ᐃᑲᔪᖃᑦᑕᖅᑐᒥᓂᕐᓄᑦ ᑕᒪᒃᑯᓂᖓ ᐊᕐᕕᓐᓂᐊᑦᑏ ᐃᓅᖃᑦᑕᖅᑐᒥᓃᑦ. ᐃᒫᒃ ᔭᒐᓚᖓᓕᖅᑎᓪᓗᒋᓪᓘᓐᓃᑦ ᑳᓕᖅᑎᓪᓗᒋᓪᓘᓐᓃᑦ, ᕿᐅᒐᓚᖓᓕᖅᑎᓪᓗᒋᓪᓘᓐᓃᑦ ᐃᑲᔪᖅᑕᐅᖃᑦᑕᖅᑐᒥᓂᐅᒻᒪᑕ.
ᑕᐃᒃᑯᐊ ᐊᖑᑏᑦ ᐃᑲᔪᖅᑎᑑᙱᑦᑐᙴᖅ ᑕᐃᒪ ᑕᒪᒃᑯᐊ ᐊᕐᓇᓂᒃ ᕿᒻᒥᓂᓪᓗ ᐊᑦᓱᐊᓗᒃ ᐃᑲᔪᖃᑦᑕᖅᑐᒥᓂᐅᒻᒥᔪᑦ. ᑕᐃᒃᑯᐊ ᐊᕐᓇᐃᑦ ᒪᑯᓂᖓ ᒥᖅᓱᖅᑎᐅᒻᒪᑕ ᑲᒥᖕᓂᒃ, ᐊᓐᓄᕌᓂᒃ ᒥᖅᓱᖅᑎᐅᕙᒃᑐᑎᒃ ᓇᒃᓴᖅᑕᐅᖃᑦᑕᖅᑐᒥᓂᐅᒻᒪᑕ, ᑕᐃᒫᒃ ᑕᒪᓐᓇ ᑐᓴᐅᒪᓇᕐᒥᔪᖅ.
ᐊᕐᕕᓂᐊᖅᑏᑦ ᐅᖃᐅᔾᔨᒐᐃᒻᒪᑕ ᐃᓄᓐᓂᒃ, “ᐅᑎᓛᕐᒥᔪᒍᑦ ᐃᒪᐃᓕᖅᑎᓪᓗᒍ ᐊᕐᕌᒎᓛᖅᑐᖅ.” ᐃᒻᒪᖄ ᔪᓚᐃᒥ ᐊᐅᒡᒍᓯᒥᓪᓘᓐᓃᑦ ᓯᑯᖃᕈᓐᓃᑎᓪᓗᒍ. ᓂᕆᐅᓕᕋᐃᒐᒥᒃ ᑲᑎᒃᐸᑦᓱᑎᒃ ᐃᓄᐃᑦ ᐊᑕᐅᑦᓯᒧᑦ ᐅᑕᖅᑭᓂᐊᓕᖅᓱᑎᒃ ᐊᕐᕕᓂᐊᖅᑏᑦ ᐅᒥᐊᕐᔪᐊᖏᓐᓂᒃ. ᐃᓄᖁᑎᕗᑦ ᓇᓪᓕᑭᑕᖅᓱᑎᒃ ᓂᖁᕐᕋᓂᐊᓕᕋᒥᒃ ᓇᖅᓴᒥ ᑕᑯᑦᓯᖅᓱᑎᒃ ᐅᒥᐊᕐᔪᐊᓂᒃ ᑕᑯᑦᓯᖅᓱᑎᓪᓘᓐᓃᑦ ᐳᔪᕐᒥᒃ ᐊᓄᕆᑐᐊᕋᐃᒻᒪᓪᓗ ᐅᖅᑯᐊᓂᒃ, ᓇᐃᒍᓐᓇᐸᑦᑐᒥᓃᑦ ᐳᔫᑉ ᑎᐱᖓᓂᒃ, ᐅᓪᓗᓕᒫᒥᒃ ᐅᓪᓘᓐᓄᑦ ᒪᕐᕉᓐᓄᑦ ᑎᑭᙱᓗᐊᖅᑎᓪᓗᒍ ᐅᒥᐊᕐᔪᖓᑦ ᐊᕐᕕᓂᐊᖅᑏᑦ. ᓇᓪᓕᑭᑕᖃᑦᑕᕐᓂᐊᓕᕋᒥᒃ ᓇᖅᓴᒦᑦᓱᑎᒃ ᑕᑯᓇᓱᐊᖅᓱᒍ ᐅᒥᐊᕐᔪᐊᖓᑦ ᐊᕐᕕᓂᐊᖅᑏᑦ ᐊᓚᒃᑲᑦᑕᕋᑕᕐᒪᓐ ᖃᐃᒐᓚᑦᑐᖃᖅᐸᒃᓱᓂ. “ᐅᒥᐊᕐᔪᐊᖅ, ᐅᒥᐊᕐᔪᐊᖅ, ᐅᒥᐊᕐᔪᐊᖅ, ᐅᒥᐊᕐᔪᐊᖅ!" ᐅᓪᓚᑦᓱᓂ ᐊᒻᒧᑦ ᓇᖅᓴᒃᑯᑦ ᑐᓴᖅᑎᒃᓯᔭᖅᑐᖅᑐᖅ ᑐᓴᕈᒥᓇᖅᑐᒥᒃ ᐃᓄᓐᓄᑦ ᐊᒡᓛᓘᓐᓃᑦ ᓂᕕᐊᖅᓯᐅᖑᓪᓗᖓ ᓇᖅᓴᒥᒃ ᒪᔪᕋᖅᐸᔪᔪᒍᑦ ᑕᑯᓇᓱᐊᕆᐊᖅᑐᖅᓱᑕ ᐅᒥᐊᕐᔪᐊᒥᒃ ᑕᑯᒐᐃᒐᑦᑕᓗ ᐅᒥᐊᕐᔪᐊᒥᒃ, ᐅᓪᓚᒃᓯᕙᔪᔪᒍᑦ ᐊᒻᒧᑦ ᓇᖅᓴᒃᖁᑦ ᐅᖃᕆᐊᖅᑐᖅᓱᑕ ᐃᓄᓐᓄᑦ ᐅᒥᐊᕐᔪᐊᖅᑕᖃᕆᐊᖓ ᖃᖏᖅᓱᒥ.
ᐃᒫᒃ, ᑕᐃᒃᑯᐊᒎᖅ ᐱᑖᕈᒪᒧᑦ ᒪᑯᓂᖓ ᖃᓪᓗᓈᖅᑕᒐᓚᓐᓂᒃ ᐃᕐᖑᓯᕐᓂᒃ, ᑏᓕᐅᕈᑎᓂᒃ, ᓴᒃᑯᓂᒃ ᓴᕕᓐᓂᒃ, ᕿᐱᓐᓂᒃ. ᖃᓪᓗᓈᖅᑕᕋᓚᓐᓂᒃ ᐱᒍᒪᒧᑦ ᓄᓕᐊᓂ ᑕᐅᖅᓯᐅᑎᖃᖃᑦᑕᒥᓂᖏᑦ ᑕᐃᒃᑯᓄᖓ ᑎᑭᓯᒪᔪᓄᑦ ᐊᒻᒪᓗ ᐊᖓᔪᖅᑳᐅᑎᓄᓪᓗᖃᐃ ᐅᒥᐊᓕᒃᑕᓕᖕᓄᑦ ᐅᕝᕙᓘᓐᓃᑦ ᖃᓪᓗᓈᑐᐃᓐᓇᕐᒧᑦ. ᑕᐃᒃᑯᐊᒎᖅ ᐊᕐᓇᖅᓯᐅᒍᒪᓕᕋᐃᒐᒥᒃ ᐊᕐᕕᓐᓂᐊᖅᑏᑦ ᐅᒥᐊᕐᔪᐊᓂᓪᓘᓐᓃᑦ ᑎᑭᓯᒪᔪᑦ, ᓄᓕᐊᖏᓐᓂᒃ ᐊᑐᑲᐃᓐᓇᕈᒪᙱᒃᑲᓗᐊᕐᒪᖔᑕ ᐊᐱᕆᖃᑦᑕᕐᓂᕐᒥᒻᒪᑕ, ᑎᒥᓛᖅ ᐅᓂᒃᑳᖃᑦᑕᓚᐅᖅᓯᒪᔪᖅ. ᐊᓱᐃᓛᒍᖅ ᑕᐃᒃᑯᐊ ᓄᓕᐊᓖᑦ ᐊᖏᑲᐃᓐᓇᖃᑦᑕᓚᐅᖅᓯᒪᔪᑦ ᐱᑖᕌᕐᔪᒍᒪᒧᑦ ᖃᓪᓗᓈᖅᑕᕋᓚᓐᓂᒃ, ᑏᒥᓪᓘᓐᓃᑦ, ᑐᐸᑭᒥᓪᓘᓐᓃᑦ, ᕿᐱᓐᓂᓘᓐᓃᑦ, ᑕᒪᒃᑯᓂᖓ ᖃᓪᓗᓈᖅᑕᕋᓚᓐᓂᒃ. ᐅᓂᒃᑳᓕᕋᐃᒻᒪᑦ ᑕᒪᑐᒥᖓ ᐃᔪᕐᓇᖃᑦᑕᓚᐅᖅᓯᒪᔪᖅ.
ᑭᓯᐊᓂᓕ ᑕᒪᒃᑯᐊ ᖃᓂᒪᓐᓇᐃᑦ ᓄᑖᑦ ᐃᓕᕙᓪᓕᐊᓕᑕᐃᓐᓇᓚᐅᒃᑲᕗᑦ ᑖᕙᖓᑦ ᖃᓪᓗᓈᑦ ᓄᓇᖓᓐᓂ ᖃᐅᔨᒪᙱᑕᑦᑎᓐᓂᒃ ᑎᑭᖃᑦᑕᒥᓂᐅᒋᐊᒐᐃᖏᑦ. ᑖᒃᑯᐊᓕ ᑐᓴᐅᒪᖃᑦᑕᓚᐅᖅᑕᕗᑦ ᐳᕝᕕᕆᓂᖅ, ᐳᕙᓪᓗᓐᓂᖅ, ᓄᕙᓪᓗᓐᓂᖅ, ᑕᐃᒪ ᑖᒃᑯᐊ ᑎᑭᒍᔾᔭᐅᖃᑦᑕᕆᐊᖏᑦ ᐅᒥᐊᕐᔪᐊᓄᑦ. ᑖᒃᑯᐊᓕ ᐃᓄᐃᑦ ᓄᓇᒥᐅᑕᐅᓪᓗᑎᒃ ᑕᒪᒃᑯᓂᖓ ᐋᓐᓂᐊᖃᓗᐊᖃᑦᑕᙱᓐᓂᕐᒪᑕ ᐳᕝᕕᕆᓂᕐᒥᒃ, ᐳᕙᓪᓗᓐᓂᕐᒥᒃ, ᓄᕙᓐᓂᕐᒥᒃ. ᑭᓯᐊᓂᒎᖅ ᑎᑭᑕᐅᒐᐃᒐᒥᒃ ᐅᒥᐊᕐᔪᐊᓄᑦ ᑕᐃᒫᒃ ᐋᓐᓂᐊᓕᖃᑦᑕᓱᒥᓂᐅᒻᒪᑕ, ᑕᒡᒐ ᖁᕕᓇᙱᔾᔪᑎᒋᑕᑐᐊᖅᑕᖓ ᑕᐃᒃᑯᐊ ᑎᑭᖃᑦᑕᖅᑎᓪᓗᒋᑦ ᐊᕐᕕᓐᓂᐊᖅᑏᑦ. ᑖᓐᓇ ᑐᓴᐅᒪᑐᐃᓐᓇᖅᑕᕋ ᐅᓂᒃᑳᕆᔭᕋ ᑕᕝᕘᓇ.
ᑕᐃᒃᑯᐊ ᓯᕗᓕᒃᑲ ᐊᕐᕕᓐᓂᐊᖅᑎᒥᓂᐅᒻᒪᑕ. ᐃᓘᓐᓇᑦᑎᐊᕌᐱᑎᒃ ᑐᓴᐅᒪᙱᑕᕋᓗᐊᒃᑲ ᖃᓄᐃᓕᐅᖃᑦᑕᖅᑐᒥᓂᐅᒻᒪᖔᑕ ᐊᒻᒪᓗᑦᑕᐅᖅ ᑕᒪᒃᑯᐊ ᐱᖃᑎᒃᑲ ᐃᓚᒃᑲᓗ ᓯᕗᓕᖃᕐᒥᒻᒪᑕ ᐊᕐᕕᓐᓂᐊᖅᑎᒥᓂᕐᓂᒃ. ᑕᒪᓐᓇ ᐅᐱᒋᑦᓯᐊᖅᑕᕋ ᐅᐱᒋᑦᓯᐊᕆᐊᓕᕗᑦ ᑕᐃᒪᐃᑦᑑᒐᑦᑕ, ᐅᓪᓗᒥᒧᑦ ᑎᑭᑦᑐᒻᒪᕆᐅᒐᑦᑕ ᑐᓴᐅᒪᑎᑕᐅᓪᓗᑕᓗ ᐅᑯᓂᖓ ᓯᕗᓕᕆᓚᐅᖅᑕᑦᑎᓐᓂᒃ. ᑕᒪᓐᓇ ᐱᒻᒪᕆᐅᖃᑕᐅᔪᐊᓘᒻᒪᑦ ᐃᓄᐃᑦ ᐃᓅᓯᖏᓐᓂᒃ ᐃᓚᖏᓐᓄᑦ ᐃᓛᒃ ᐊᒥᓱᕐᔪᐊᕌᓗᖕᓄᑦ ᐅᑭᐅᖅᑕᖅᑐᒥᐅᓄᑦ. ᑕᒪᓐᓇ ᐃᓅᓯᑦᑕ ᐃᓚᒋᒻᒥᒻᒪᐅᒃ ᐊᕐᕕᓐᓂᐊᕐᓂᖅ ᐃᓚᒋᑦᓯᐊᕐᒪᐅᒃ, ᐃᓛᒃ ᐅᓪᓗᒥᒧᑦ ᑎᑭᑦᑐᓂᓗ, ᑕᐃᒃᑯᐊ ᓯᕗᓕᕗᑦ ᐅᐱᒋᑦᑎᐊᕐᓚᕗᑦ ᐊᒻᒪᓗᑦᑕᐅᖅ ᐅᕙᑦᑎᓐᓂᒃ ᐅᐱᒋᓗᑕ ᓯᕗᓕᖃᕆᐊᖅ ᑕᐃᒃᑯᓂᖓ ᐊᕐᕕᓐᓂᐊᖅᑎᒥᓂᕐᓂᒃ. ᖁᔭᓐᓇᒦᒃ.
ᐊᐱᖅᓱᑕᐅᑦᓱᓂ ᐅᖃᐅᓯᒥᓂᖏᑦ ᐃᖅᑲᒋᑦᓯᐊᓇᖅᑐᖅ ᐋᓐ ᒥᑭᔾᔪᒃ ᕼᐋᓐᓴᓐ
ᑲᒥᓯᓇᖓ ᓄᓇᕗᑦ